एचआइभी संक्रमतिलाई गाउँपालिकाले दियो पोषण भत्ता
शिवराज ढुङ्गाना /अछाम, असार २४ गते । जिल्लाको बान्नीगढी जयगढ गाउँपालिकामा रहेका एचआईभी संक्रमितलाई पोषण भत्ता वितरण गरिएको छ । गाउँपालिकामा रहेका ६ वटै वडाका ३४ जना संक्रमितलाई पोषण भत्ता दिइएको हो ।
एचआईभी संक्रमितमा पोषणको अवस्था कमजोर हुनेभएकोले पोषणमा कमी हुन नदिन प्रतिव्यक्ति तीनहजार दुईसय ३५ का दरले पोषण भत्ता वितरण गरिएको गाउँपालिकाले जानकारी दिएको छ । गाउँपालिकाले पहिलो पटक पोषण अभावमा रहेका एचआइभी संक्रमितलाई एकमुष्ट रकम प्रदान गरिएको हो ।
पोषण भत्ता वितरण पछि एचआइभी संक्रमित अगुवा गंगा थापाले गाउँपालिकाले पोषण भत्ताले आफूहरूलाई उत्साहित बनाएको बताउनुभएको छ । थापाले संक्रमति भएर रोग र अपमानबाट बाँचिरहेका व्यक्तिलाई सानै भए पनि गाउँपालिकाले राहत दिएको प्रतिक्रिया दिनुभयो । जनस्वास्थ्य अधिकृत चक्रबहादुर बिष्टले संक्रमितहरूले सम्मानपूर्वक बाच्न पाउने हक र सामाजिक सुरक्षाको हकको सुनिश्चितताका भएको बताउनुभयो ।
गाउँपालिका अध्यक्ष राजेन्द्रबहादुर खड्काले एचआइभी संक्रमित लगायत पछाडि परेकाको जीवनस्तर उकास्ने विषयमा गाउँपालिका सजग रहेको भनाइ राख्नुभयो । राहत वितरण गर्दै अध्यक्ष खड्काले एचआइभी संक्रमितलाई गाउँपालिकाबाट सम्मानित भएर बाँच्नेगरी नीति बनाउने समेत बताउनुभयो ।
अछाम जिल्लामा जेठ मसान्तसम्म १४ सय ११ एचआइभी संक्रमितको संख्या रहेको जिल्ला स्वास्थ्य कार्यालय अछामले जानकारी दिएको छ । जसमा सातसय नौ महिला र छसय ३४ पुरुष रहेका छन् । जसमा नियमित उपचार गराउने ६१६ जना मात्र छन् । नियमित उपचार, पोषण नपुगेका कारण संक्रमितहरू कमजोर बन्ने क्रम बढीरहेको जिल्ला अस्पाताल अछामका डाक्टर अतुल भारद्वाजको भनाइ छ ।