नर्सरीबाटै विदेशको कमाई
खलङ्गा, साउन १५ गते । जीवन निर्वाहको लागि वर्षेनी युवाहरु विदेशिने क्रम बढे पनि यहाँ युवाहरुले नर्सरीबाट लाखौं आम्दानी गर्न सफल भएका छन् । जिल्लाको कुशे गाउँपालिका ५, दम्दाला गाउँका युवा उद्यमी शिव मल्लले यसबर्ष नर्सरीबाटै आठलाख आम्दानी गर्नुभएको छ । पाँच वर्षअघि स्थापना गरेको प्रवीन हिउँदे तथा वर्षे फलफूल नर्सरी उद्योगबाट यसपाली उहाँले ७१ हजार फलफूलका विरुवा बेचेर मनग्ये आम्दानी गर्नुभएको हो ।
नलगाड नगरपालिका ४, जोगनीडाँडाका अर्का युवा उद्यमी केशवबहादुर रावलले ३२ हजार बिरुवा बेचेर पाँच लाख आम्दानी गर्नु भएको छ । ६ वर्ष अघि उहाँले रावल फलफूल नर्सरी उद्योग सञ्चालन गरेर बिरुवा उत्पादन गर्दै आउनुभएको छ । मल्ल र रावल जस्तै जाजरकोट जिल्लाका २० जनाभन्दा बढी युवाहरु नर्सरीबाट मनग्ये आम्दानी गर्न सफल भएका छन् । जिल्लामै कृषकहरु नर्सरीतर्फ आकर्षित भएकाले जिल्लामा चाहिने बिरुवा बाहिरी जिल्लाबाट ल्याउनुपर्ने बाध्यता हटेको छ ।
युवाहरुले गाँउमै नर्सरी सञ्चालन गरेर आवश्यक पर्ने बिरुवा आपूर्ति गर्दै आएको कृषि ज्ञान केन्द्र जाजरकोटका प्रमुख चित्रबहादुर रोकायले बताउनुभयो । गाउँमै पनि थोरै लगानी गरेर राम्रो आम्दानी गर्न सकिन्छ, ज्ञान केन्द्रका प्रमुख रोकायले भन्नुभयो, नर्सरीबाट हुने आम्दानीले रोजगारीका लागि विदेश जार्ने युवालाई प्रेरणा गाउँघरमै व्यवसाय गर्न प्रेरणा मिलेको छ ।
नर्सरी सुरुवात गर्दा ४० हजार लगानीबाट गरेको रावलले नर्सरीले आफ्नो जीवनमा ठूलो परिवर्तन ल्याएको बताउनुभयो । हाल उहाँको नर्सरीमा ओखर, कागती, सुन्तला, अनार, टिमुर, बकाइनो, काउँलो, चिउरी आदि बिरुवा पाइन्छ ।
सामान्य लेखपढ गरेका मल्ल र रावल रोजगारीको खोजीमा धेरै पटक भारतको कालापहाड पुगको अनुभव सुनाउनुहुन्छ ।
‘कालापाडको कमाइले घर व्यवहार चलाउन मुस्किल थियो, रोजगारीको खोजीमा भौतारिनु भन्दा आफैंले उद्यम सञ्चालन गर्ने सोचेर नर्सरीमा हात हाले, अहिले राम्रै आम्दानी भैइरहेको छ । मल्लले आफ्नो अनुभव भन्नुभयो ।