जनहितलाई केन्द्रमा राखेर काम नगरे सत्ता उल्टने संभावना बढ्छ : प्रचण्ड
नेकपाका अध्यक्ष पुष्पकमल दाहाल ‘प्रचण्ड’ले जनहितलाई केन्द्रमा राखेर काम नगरे सत्ता उल्टन सक्ने संभावना रहेको बताएका छन् ।
ललितपुरमा शुक्रबार आयोजित कार्यक्रमलाई सम्बोधन गर्दै उनले सत्तामा जानु अघि जनतासंग गरेको प्रतिवद्धता भुल्दै जाने र आफ्नै योगदानलाई विर्सदैं जाने हो भने प्राप्त उपलब्धि सजिलै गुम्न सक्ने खतरा औंल्याएका हुन् ।
कम्युनिष्ट सरकारको कार्यशैली वास्तविक कम्युनिष्टको चिन्तन र विचार भन्दा भिन्न बुर्जुवाकरण हुदै जाने हो भने सत्ता परिर्वतन हुन समय नलाग्ने भन्दै उनले यसतर्फ गम्भीर हुनुपर्ने बताए ।
पुर्वी युरोप, सोभियत संघको उदाहरण दिदै उनले कम्युनिष्ट नेताले सत्तामा पुगेपछि कम्युनिष्ट चिन्तन र कार्यशैली विर्सन नहुने उल्लेख गरे ।
उनले कम्युनिष्ट नेता नै राजा महाराजा जस्तो हुँदै गएपछि राजा महाराजका विरुद्ध लडेका जनताहरु यिनलाई पनि लखेठ्न पर्छ भन्ने अवस्थामा पुग्नेजस्ता विडम्बना आउन दिन नहुने बताए । ‘हामी कहा पनि यसो लक्षण हेर्दा यस्तै देखिन खोजेको छ,’ उनले भने् ।
दुई पार्टी मिलेर बनेको ठुलो पार्टी भित्र पछिल्लो समय अनुशासन र जिम्मेवारी बोधमा विचलन देखिएको भन्दै उनले असन्तुष्टी जनाए । विगतमा जनताका समस्या बुझ्ने, अनशासित र जिम्मेवारी लिने पथमा देखिएका कम्युनिष्टहरुमा अहिले अनुशासनहिनता र कर्तव्यबोधबाट पन्छिने प्रवृति बढेको उनले टिप्पणी गरे ।
दाहालले सत्तामा पुगेपछि जनतासंग गरेका प्रतिद्धताहरु विर्सने प्रवृति विश्वभरीका कम्युनिष्टहरुको विशेषता नै भएको भन्दै अन्य मुलकमा देखिएको प्रवृति नेपालमा पुनरावृत हुन नदिन तर्फ सचेत हुनुपर्नेमा जोड दिए ।
उनले वर्तमान राज्यसत्ता प्राप्तीका लागि विगतमा आफैले गरेको योगदानको अवमुल्यन गर्ने काम नेतृत्वबाट हुन नहुने तर्फ सचेत हुनुपर्ने आवश्यकता औंल्याए ।