कार्यालय समयमा मोबाईल नचलाउन कर्मचारीलाई मन्त्रीकाे निर्देशन
काठमाडौँ,भदौ १५ गते । संस्कृति, पर्यटन तथा नागरिक उडड्यनमन्त्री योगेशकुमार भट्टराईले त्रिभुवन विमानस्थलका कर्मचारीलाई कार्यालय समयमा मोबाईल फोनमा संवाद नगर्न सचेत गराएका छन् ।
उनले अख्तियार दूरुपयोग अनुसन्धान आयोगलगायतका निकायको छानबिनमा रहेका विमानस्थलका कर्मचारीलाई तत्काल हटाउने चेतावनी दिए । ‘त्रिभुवन अन्तर्राष्ट्रिय विमानस्थलका कर्मचारीको सकारात्मक सोच’ विषयक प्रशिक्षण तालिमको आइतबार काठमाडौंमा उद्घाटन गर्दै उनले कुनै पनि दाग लागेका कर्मचारीहरुलाई विमानस्थलमा नराख्ने स्पष्ट पारे । मन्त्री भट्टराईले कार्यालय समयमा निदाउने, फेस बुक चलाएर बस्ने कर्मचारीहरुको तस्वीर आफूले संकलन गरेको उल्लेख गर्दै उनीहरुमाथि कारबाही गर्न विमानस्थलका नेतृत्वलाई निर्देशन दिए ।
सो विमानस्थलका अनुशासनहिन कर्मचारीलाई कारबाही दायरामा ल्याउन सिसिटिभी क्यामेराको थप व्यवस्था गर्ने मन्त्री भट्टराईको योजना छ । मन्त्री भट्टराईले अन्तर्राष्ट्रिय विमानस्थल मुलुकको ईज्जतसँग जोडिएकाले पनि यसका कर्मचारीहरु बढी अनुशासित हुनुपर्ने बताए ।
सेवाग्राहीले विमानस्थलका कर्मचारीहरुको व्यवहारप्रति नकारात्मक टिप्पणी गर्ने गरेकाले सरकारले त्यसमा सुधार ल्याउन प्रशिक्षण कार्यक्रम सुरु गरेकाे उनले स्पष्ट पारे । ६ दिनसम्म चल्ने सो प्रशिक्षण कार्यक्रमले कर्मचारीहरुको काम गर्ने शैलीमा पनि सुधार आउने उनले विश्वास व्यक्त गरे । प्रशिक्षण कार्यक्रममा विमानस्थलका कर्मचारी र त्यहाँ खटिएका सुरक्षाकर्मीहरु सहभागी भएका छन् ।