एटिएमबाट रकम झिक्ने चिनियाँलाई सहयोग गर्ने तीन नेपाली पक्राउ
काठमाडौँ,भदौ १६ गते । एटिएमबाट ह्याकरले पैसा निकालेको प्रकरणमा प्रहरीले ५ चिनियाँ नागरिकसँगै एक फ्रान्सेली र सहयोग गर्ने तीन नेपालीलाई पक्राउ गरेको छ । शनिबार भएको उक्त घटनाकाे अनुसन्धानमा संलग्नको पहिचान गरी प्रहरीले उनीहरूलाई पक्राउ गरेको हो । चिनियाँ ह्याकरले नेपाली रुपैयाँ साट्ने दुई मनी चेञ्जर (पैसा सटही)का सञ्चालक र प्रबन्धकलाई पक्राउ गरेको हो ।
पक्राउ पर्नेमा ठमेलस्थित डेक्सो मनी चेञ्जरका सञ्चालक वेदनाथ लामिछाने र नेपालय मनी चेञ्जरका सञ्चालक रोशन प्रधान श्रेष्ठ र प्रबन्धक रेवती दुवाडी पक्राउ परेका हुन् । प्रहरीले एटिएमबाट पैसा निकालेका चिनियाँले ठमेलका यी दुई मनी चेञ्जरमा पैसा साटेको सिसी क्यामेराबाट देखिएको जनाएको छ ।
एटिएमबाट अवैध रकम झिकेको घटनाको अनुसन्धान गरेका डिएसपी होविन्द्र बोगटीले निकालेकाे रकम मनी चेञ्जरबाट बरामद भएको बताए । उनले उक्त रकम बरामद भएको जानकारी दिए । बोगटीका अनुसार दुई चिनियाँ नागरिक भने फरार छन् । उनीहरु नेपालमै छन कि बाहिर पुगे भन्ने खुलेको छैन ।