त्रिभुवन अन्तर्राष्ट्रिय विमानस्थलमा सुरक्षा व्यवस्था थप
काठमाडौँ, भदौ ३१ गते। त्रिभुवन अन्तर्राष्ट्रिय विमानस्थलले ‘नेपाल भ्रमण वर्ष–२०२०’लाई लक्षित गरी विमानस्थलकाे सुरक्षा व्यवस्थापनलाई तीव्रता दिएको छ । विमानस्थलको सुरक्षा निकायका प्रमुख डिआइजी सूर्यप्रसाद उपाध्यायले विमानस्थलको सुरक्षामा उचित व्यवस्थापन गर्न तीव्रता दिइएको जानकारी गराएका हुन् ।
डिआइजी उपाध्यायले ‘नेपाल भ्रमण वर्ष–२०२०’समेत ध्यानमा राखेर विमानस्थलको सुरक्षाका लागि थप सय वटा सिसीटिभी क्यामेरा जडान गर्न लागिएको जानकारी दिए । हाल विमानस्थलमा तीन सय ४५ वटा सिसीटिभी क्यामेरा जडान गरिएको छ । अब थप हुने सिसीटिभी क्यामेराले विमानस्थलको सुरक्षा व्यवस्थालाई थप भरपर्दो बनाउने उनले बताए ।
डिआइजी उपाध्यायले विमानस्थलबाट समान नहराउने भरपर्दो व्यवस्था गरिएको पनि दावी गरे । उनले यात्रुको सामान हराए सम्बन्धित एयरलाइन्सबाट नै क्षतिपूर्ति दिलाउने व्यवस्था गरिएको बताए । सबै सामानहरु सिसीटिभी क्यामेराको निगरानीमा राखेर यात्रुलाई दिने गरेकाे विमानस्थलले जानकारी दिए ।
विमानस्थलका प्रमुख राजकुमार क्षेत्रीले विमानस्थलको व्यवस्थापनका लागि सम्बन्धित सबै निकायसँग आवश्यक समन्वय गर्न प्राथमिकता दिने बताए ।