गुल्मीमा पर्यटक आकर्षित गर्दै ‘ट्री हाउस’
गुल्मी, मड्सिर ७ गते । गुल्मीको रेसुंगा नगरपालिका– ७ उनायचौरमा ‘ट्री हाउस’ निर्माण गरिएको छ । शनिबार उधोग, पर्यटन वन तथा वातावरण मन्त्री लिला गिरिले ‘ट्री हाउस’को उद्घाटन गर्दै प्रदेश ५ कृषि पर्यटनबाट मात्रै समृद्ध बन्ने भएकाले आफु योजनाबद्ध रुपमा लागिपरेको बताए ।
उनायचौरको ४२ फुट अग्लो रुखको टुप्पामा १० जना मान्छे बस्न मिल्ने घर निर्माण गरिएको छ । उक्त रुखको टुप्पोमा पुग्न एक सय सिँढी उक्लनु पर्छ । त्यहाँबाट तम्घाससहित उत्तरका मनोरम हिमालको दृश्यावलोकन गर्न सकिने रेसुङा नगरपालिका ७ का वडा अध्यक्ष मोहन पाण्डेले बताए ।
‘ट्री हाउस’ मा चढ्न टिकट विद्यार्थीलाई १० रुपैयाँ, अन्यलाई २० र ज्येष्ठ नागरिकलाई निःशुल्क व्यवस्था गरिएको छ ।
उनायचौर भगवती मन्दिर व्यवस्थापन समितिले प्रदेश ५ को वन मन्त्रालयअन्तर्गत डिभिजन वन कार्यालय गुल्मी र उपभोक्ताको गरि १३ लाख ३८ हजार नौ सय ११ रुपैयाँ लगानीमा रुखको टुप्पामा घर निर्माण गरेको समितिका सचिव युवराज मरासिनीले बताए । ट्री हाउस गत दुई महिनादेखि सञ्चालनमा छ । ‘पहिले चौर र मन्दिर मात्रै भएकाले कम मान्छे आउथे,’ मरासिनीले भने, ‘अहिले ट्री हाउसमा चढ्न दैनिक ३ सयसम्म आन्तरिक पर्यटक आउने गरेका छन् ।’ ३ भदौदेखि सञ्चालनमा आएको ट्री हाउसबाट हालसम्म करिब २० हजारले अवलोकन गरिसकेको उनले बताए । टिकट बिक्रीबाट एक लाख ८९ हजार रुपैयाँ रकम संकलन भएको मरासिनीले बताए । संकलित रकम कोषमा जम्मा गर्ने र अन्य पर्यटकीय संरचना निर्माण गरिने उनले बताए ।