ललितपुरमा साइकल यात्रुको लागि छुट्टै लेन; मेयर शाक्यको घोषणा : महानगरमा हरियाली पार्क नै पार्क
ललितपुर महानगरपालिकाले साइकल यात्रुको लागि सडकमा छुट्टै साइकल लेन बनाई संचालनमा ल्याएको छ ।
शनिबार महानगरपालिकाले आयोजना गरेको एक कार्यक्रममा कुपोन्डोल, पुल्चोक, जावलाखेल, लगनखेल हुँदै मंगलबजारसम्म र कुपोन्डोल, पुल्चोकबाट सिधा मंगलबजार पुग्न सकिने गरि साइकल लेन निर्माण गरिएको बताइएको छ । चालु सडकमा नै छुट्याइएको साइकल लेन १.५ मिटर चौडाइको रहेको छ ।
कार्यक्रममा ललितपुर महानगरपालिकाका प्रमुख चिरीबाबु महर्जनले काठमाडौं उपत्यकालाई साइकलमैत्री सडक बनाउने अभियानको थालनी भएको बताए । उनले साइकल लेनले शिवपुरी र फुलचोकी जोड्न चाहेको बताए ।
अहिले महानगरले पाटन दरबार क्षेत्र केन्द्र बनाएर चारै दिशाबाट दरबार क्षेत्रमा आउन चारवटा साइकल लेन बनाउने योजना रहेको बताएको छ । अहिले व्यवस्था गरिएको साइकल लेनमा अन्य सवारी साधन सँग मिलेर चलाउनु पर्ने हुन्छ ।
मेयर शाक्यको घोषणा : महानगरमा हरियाली पार्क नै पार्क
काठमाडौं महानगरपालिकाका मेयर विद्यासुन्दर शाक्यले काठमाडौं महानगरभित्र हरियाली पार्क बनाउने घोषणा गरेका छन् । शनिबार महानगर वडा नम्बर ५ बुद्धविहारले आयोजना गरेको कार्यक्रममा बोल्दै उनले सार्वजनिक जग्गामा हरियाली पार्क बनाउने घोषणा गरेका हुन् ।
‘महानगरपालिकाले सार्वजनिक जग्गामा पार्क बनाउने अभियान सुरु गरेको छ ,’ उनले भने, ‘तीन वर्षभित्र हरियाली पार्क बनाइ सक्छौँ ।’ महानगरको प्रत्येक वडामा पार्क बनाउने काम भइरहेको पनि उनले जिकिर गरे । कार्यक्रममा बाेल्दै उनले ऐतिहासिक सम्पदाको पुनर्निर्माणको काम तिब्र रूपमा अगाडि बढिरहेका बताए ।
कार्यक्रममा नेकपा केन्द्रीय सदस्य एवं प्रदेश सांसद नारायण शिलवालले सार्वजनिक सम्पत्तिको संरक्षण गर्नु पर्नेमा जोड दिए । ‘सार्वजनिक सम्पत्तिको संरक्षण र विकास गर्नुपर्छ,’ उनले भने, ‘सार्वजनिक सम्पत्तिको संरक्षण स्थानीयबाट हुनुपर्छ ।’
भूमाफियाले मिचेको सार्वजनिक जग्गा फिर्ता ल्याउने पनि शिलवाले बताए । वडा नम्बर ५ मा भूमाफियाले मिचेका जग्गा स्थानीयवासीको सहयोगमा फिर्ता ल्याउने उनले बताए । कार्यक्रममा वडा नम्बर ५ का वडाध्यक्ष रमेश डंगोल र नेकपा नेता विरेन्द्र प्रजापतिले सार्वजनिक सम्पत्तिको संरक्षण गर्नु पर्ने धारणा राखेका थिए । महानगरको ९० लाखको बजेटमा वडा नम्बर ५ मा बुद्धविहार बनाउने काम भइरहेको छ ।