थप ५२५ सङ्क्रमित, कुल सङ्क्रमित २४ हजार ९५७
काठमाडौँ, साउन २९ गते । कोरोना भाइरसबाट बिहीबार थप ५२५ सङ्क्रमित भएका छन् । स्वास्थ्य तथा जनसङ्ख्या मन्त्रालयको नियमित पत्रकार सम्मेलनमा प्रवक्ता डा. जागेश्वर गौतमले कुल सङ्क्रमित २४ हजार ९५७ पुगेको बताउनुभयाे ।
पछिल्लो २४ घण्टामा नौ हजार ८५९ जनाको पीसीआर परीक्षणमा सङ्ख्या थपिएको हो ।
सक्रिय सङ्क्रमित आठ हजार २५ जना रहेका छन् भने क्वारेन्टिनमा १४ हजार ७६९ र होम क्वारेन्टिनमा ४६६ जना रहेका छन् । पाँच सयभन्दा बढी सङ्क्रमित भएर उपचारमा रहेका जिल्लाहरू चार वटा काठमाडौँ, पर्सा, रौतहट र महोत्तरी रहेका छन् । त्यसैगरी, शून्य सङ्क्रमित हुने छ वटा जिल्लाहरू सङ्खुवासभा, सोलुखम्बु, मनाङ, मुस्ताङ, डोल्पा र हुम्ला रहेका छन् ।
यस्तै, बिहीबार १०९ जना उपचारपछि घर फर्केका छन् । यसरी अस्पतालबाट उपचारपछि डिस्चार्ज हुनेको सङ्ख्या १६ हजार ८३७ पुगेको छ । सङ्क्रमित भएर मृत्यु हुने ९५ पुगेको छ ।