निजी क्षेत्रलाई मन्त्री पुनको आग्रह– ढुक्क भएर जलविद्युतमा लगानी गर्नुस्, सरकार बिजुली किन्न तयार छ
काठमाडौँ, भदौ १ गते । ऊर्जा, जलस्राेत त तथा सिँचाइमन्त्री वर्षमान पुन अनन्तले जलविद्युत् क्षेत्रमा ढुक्क भएर लगानी गर्न निजी क्षेत्रलाई अपिल गरेका छन् । नेपाल विद्युत् प्राधिकरणको ३५औँ वार्षिकोत्सवका अवसरमा सोमबार आयोजित कार्यक्रममा मन्त्री पुनले निजी क्षेत्रको लगानी सुरक्षा गर्न सरकार प्रतिबद्ध रहेको बताए ।
निजी क्षेत्रबाट उत्पादित बिजुली सरकारले खरिद गर्ने र बजारको व्यवस्था मिलाउने पुनको भनाइ थियो । सरकारले विद्युत् उत्पादन गर्न अनुमति प्रदान गर्ने, तर खरिद सम्झौता (पिपिए) नहुने भन्ने हुनै नसक्ने पुनको प्रस्टाेक्ति छ । ‘लगानी गर्नुस्, भनेर लाइसेन्स दिएपछि पिपिए नगर्ने भन्ने हुँदैन । तपाईंहरू लगानी गर्नुस् । म विश्वास दिलाउन चाहन्छु सरकारले पिपिए गर्छ,’ पुनले भने, ‘निजी क्षेत्रले उत्पादन गरेको विद्युत् खरिद गरेर बजारको व्यवस्था गर्छौं । यो सरकारको प्रतिबद्धता हो ।’
उनले उत्पादित बिजुली देशभित्रै घरेलु बजारमा खपत नभए क्षेत्रीय बजारको व्यवस्था गर्नेसमेत बताए । स्वतन्त्र ऊर्जा प्रवर्द्धकहरूको संस्था (इपान) ले जलविद्युतमा निजी क्षेत्रको ७ खर्ब लगानी रहेको बताउँदै आएको चर्चा गर्दै मन्त्री पुनले लगानी डुब्न नदिने प्रतिबद्धता जनाए ।
हालसम्म विद्युत् प्राधिकरणले सात हजार मेगावाटको विद्युत् खरिद सम्झौता गरेको र २१ हजार मेगावाटको सर्भे लाइसेन्स जारी भएको जानकारी उनले दिए । यस्तै, थप सात हजार विद्युत् उत्पादनका लागि लाइसेन्स माग भएको पुनले जानकारी दिए । उनले व्यवसायीहरूलाई पनि जोखिम मोल्न तयार हुन र आत्मानुशासित बन्न सुझाब दिए । लकडाउनका समयमा समेत चिनियाँ, भारतीय, जापानी र कोरियन कम्पनीले जलाशययुक्त र नदी प्रवाहमा आधारित ठूला जलविद्युत् आयोजनामा लगानी गर्ने इच्छा दर्शाएको उनले बताए ।
भरपर्दो वितरण, चुहावट नियन्त्रण, स्वदेशमै उत्पादित बिजुली किन्न सक्ने अवस्थामा प्राधिकरणलाई पुऱ्याउने योजनासहित मन्त्रालयले काम गरिरहेको उनको भनाइ छ । ‘यसलाई सकारात्मक चुनौतीका रूपमा लिएर अझै राम्रो बनाउने र लक्ष्य हासिल गर्ने हाम्रो प्रतिबद्धता रहनेछ,’ पुनले भने । अझै मुलुकका १० प्रतिशत जनता अँध्यारोमा रहेकाले उनीहरूलाई दुई वर्षभित्र विद्युत् पहुँचमा पुऱ्याउन सरकारले काम गरिरहेको उनको दाबी छ ।
यस्तै सेवा पुगेका स्थानमा विद्युतसेवा भरपर्दो, सुलभ र प्रभावकारी बनाउने दायित्व प्राधिकरणको भएको उनले बताए । ‘आगामी दुई वर्षमा सम्पूर्ण नेपालीको घरमा उज्यालो पुऱ्याउने संकल्प र प्रतिबद्धता पूरा गर्न तयार छौँ,’ पुनले भने, ‘त्यसका प्राधिकरणले फ्रन्टलाइनमा रहेर काम गर्छ ।’
विगतभन्दा राम्रो प्रयत्न भएको र अझ राम्रो गर्न आन्तरिक व्यवस्थापन, प्रशासनिक चुस्तता र खरिदका व्यवस्थापन चुस्त बनाउन प्राधिकरणले आफैँसँग प्रतिस्धर्पा गरिरहेको उनको भनाइ छ ।
वार्षिकोत्सवका अवसरमा कर्मचारी कल्याणकारी कोषमा ७ करोड र कार्यकारी निर्देशकदेखि स्थायी, अस्थायी, करार र ज्यालादारीसमेत गरी प्रत्येक कर्मचारीलाई सात हजार रुपैयाँ प्रोत्साहनस्वरूप दिने प्राधिकरण सञ्चालक समितिले निर्णय गरेको जानकारी पनि मन्त्री पुनले दिए ।