थप ८१८ सङ्क्रमितसहित कुल सङ्ख्या ३१ हजार ९३५ पुग्याे; काठमाडौँ उपत्यकामा १६६ नयाँ सङ्क्रमित
काठमाडौँ, भदाै ७ गते । कोरोना भाइरसका ८१८ जना सङ्क्रमित थपिएका छन् । स्वास्थ्य तथा जनसङ्ख्या मन्त्रालयका अनुसार पछिल्लो चौबीस घण्टामा २२० महिला र ५५८ जना पुरूषकाे काेराेना पुष्टि भएको हाे ।
नेपालमा अहिले सक्रिय सङ्क्रमितहरू १३ हजार १५५ रहेका छन् । क्वारेन्टिनमा ११ हजार ४१४ रहेका छन् । स्वास्थ्य तथा जनसङ्ख्या मन्त्रालयका अनुसार पछिल्लो चौबीस घण्टामा आठ हजार २६ पीसीआर परीक्षणमा भएकाे थियाे । संस्थागत आइसाेलेसनमा नाै हजार २१२ र हाेम आसाेलेसनमा तीन हजार ९४३ रहेका छन् ।
मन्त्रालयका प्रवक्ता डा. जागेश्वर गौतमले थपिएका सङ्क्रमितसँगै नेपालमा कुल सङ्क्रमितको सङ्ख्या ३१ हजार ९३५ पुगेको नियमित पत्रकार सम्मेलनमा जानकारी दिनुभयाे । देशका विभिन्न जिल्लामा रहेका अस्पतालबाट २८१ जना सङ्क्रमित निको भएर घर फर्किएका छन् । याेसँगै हालसम्म १८ हजार ६३१ जना सङ्क्रमित निको भएर घर फर्किएका छन् ।
काठमाडौँ उपत्यकामा चाैबीस घण्टामा १६६ नयाँ सङ्क्रमित
काठमाडाैँ उपत्यकामा पछिल्लो चौबीस घण्टामा १६६ जनामा सङ्क्रमणको पुष्टि भएको छ । स्वास्थ्य तथा जनसङ्ख्या मन्त्रलायका अनुसार काठमाडाैँ उपत्यकाको तीन जिल्लामा १६६ जनामा सङ्क्रमणको पुष्टि भएको छ ।
मन्त्रालयले दैनिक नियमित प्रेस ब्रिफिङको क्रममा काठमाडाैँमा १२६, ललितपुरमा १२ र भक्तपुरमा २८ गरी पछिल्लो चौबीस घण्टामा १६६ जना सङ्क्रमित थपिएको जनाएको छ । पछिल्लो चौबीस घण्टामा आठ हजार २६ जनाको स्वाब परीक्षण गरिएको छ । काठमाडाैँ उपत्यकाको त्रिवि शिक्षण अस्पताल–महाराजगञ्ज, वीरेन्द्र अस्पतालबाट कोभिड–१९ को परीक्षण गराउनेको तथ्याङ्क उपलब्ध नभएकोले पीसीआर सङ्ख्या घटेको मन्त्रालयका प्रवक्ता डा. जागेश्वर गौतमले बताउनुभयो ।
काठमाडाैँ उपत्यकामा शनिबार हालसम्मकै सबैभन्दा बढी २१६ जनामा सङ्क्रमणको पुष्टि भएको थियो ।