थप ८५५ जना नयाँ सङ्क्रमितसहित ३३ हजार ५२३ पुग्याे; काठमाडौँमा २३२ सङ्क्रमित थपिए
काठमाडौँ, भदौ ९ गते । नेपालमा कोरोना भाइरसका ८५५ जना नयाँ सङ्क्रमित पुष्टि भएको छ । थप सङ्क्रमितमा २७१ महिला र ५८४ जना पुरुष रहेका छन् ।
मङ्गलबार भएकाे मन्त्रालयकाे नियमित प्रेस ब्रिफिङमा पछिल्लो चौबीस घण्टामा दश हजार ४५३ जनाको आरटी पीसीआर परीक्षण गरिएकोमा कुल सङ्क्रमितको सङ्ख्या ३३ हजार ५२३ पुगेको हाे । मन्त्रालयले पछिल्लो चौबीस घण्टामा ३१३ जना कोरोना सङ्क्रमित निको भएर घर फर्केको जनाएको छ ।
सङ्क्रमित वृद्धि हुँदै गर्दा निको हुने दर भने अहिले विस्तारै घट्दैगएको छ । हाल सङ्क्रमित निको हुने दर ५७ प्रतिशतमा झरेको छ ।
क्वारेन्टिनमा अहिले दश हजार ४५३ जना रहेका छन् ।
सात जनाको मृत्यु
नेपालमा २४ घण्टामा सात जनाको मृत्यु भएको छ । योसँगै मृत्यु हुनेको सङ्ख्या १६४ पुगेको छ ।
काठमाडौँ उपत्यकामा कोरोनाका २३२ सङ्क्रमित थपिए
काठमाडौँ उपत्यकामा कोभिड–१९ का २३२ जना नयाँ सङ्क्रमितको पुष्टि भएको छ । स्वास्थ्य तथा जनसङ्ख्या मन्त्रालयका अनुसार पछिल्लो चौबीस घण्टामा काठमाडौँ उपत्यकामा कोरोनाभाइरसका २३२ सङ्क्रमितको पुष्टि भएको हो ।
मन्त्रालयले दैनिक गर्दैआएको प्रेस ब्रिफिङ्को क्रममा प्रवक्ता डा. जागेश्वर गौतमले काठमाडौँ उपत्यकाको तीन जिल्ला काठमाडौँमा १९९, ललितपुरमा १९ र भक्तपुरमा १४ गरी २३३ जना सङ्क्रमित थपिएको जानकारी दिनुभयो ।