थप एक हजार १११ काेराेना सङ्क्रमितसँगै कुल ३५ हजार ५२९; उपत्यकामा ३७७ जनामा सङ्क्रमण
काठमाडौँ, भदौ ११ गते । नेपालमा एक हजार १११ काेराेना सङ्क्रमित थपिएका छन् । पछिल्लो २४ घण्टामा १२ हजार ६२९ जनाको आरटी पीसीआर परीक्षणबाट आएको नतिजाबमोजिम एक हजार १११ जनामा सङ्क्रमण पुष्टि भएको हाे ।
स्वास्थ्य तथा जनसङ्ख्या मन्त्रालयले दैनिक प्रेस ब्रिफिङको क्रममा पछिल्लो २४ घण्टामा थपिएकासँगै सङ्क्रमित हुने कुल ३५ हजार ५२९ पुगेको जनाएको छ ।
थप ३३४ महिला र ७७७ जना पुरुषलाई कोरोना भाइरस पुष्टि भएको छ । नेपालमा अहिले सक्रिय सङ्क्रमितहरू १५ हजार २७३ रहेका छन् । होम आइसोलेसनमा छहजार २१० र संस्थागत आइसोलेसनमा नौ हजार ६३ रहेका छन् ।
आइसीयूमा १४९ जना
प्रदेश १ मा ११, प्रदेश २ मा ४४, बागमतीमा ७३, गण्डकीमा तीन, प्रदेश ५ मा १८ रहेका छन् । कर्णाली र सुदूरपश्चिममा कोही पनि आइसीयूमा रहेका छैनन् ।
भेन्टिलेटरमा १७ जना
भेन्टिलेटरमा १७ जनाकाे उपचार भइरहेकाे छ । प्रदेश १ मा दुई र बागमती प्रदेशका १५ जना भेन्टिलेटरमा रहेर उपचार गराइरहनुभएका छन् ।
डिस्चार्ज २० हजार ७३, निको हुने दर ५६ प्रतिशत
पछिल्लो २४ घण्टामा ५६९ जना कोरोना सङ्क्रमित निको भएर घर फर्केका छन् । योसँगै कुल निको हुने दर ५६ प्रतिशतमा झरेको छ । कुल डिस्चार्ज भएकाहरू २० हजार ७३ पुगेको छ ।
विदेशबाट फर्केका अधिकांश नेपाली क्वारेन्टिनमा बसेको छन् । यसरी बस्ने सङ्ख्या नौहजार ४८६ रहेका छन् ।
नौवटा जिल्ला पाँच सयभन्दा माथि
मोरङ, धुनषा, पर्सा, बारा, महोत्तरी, सर्लाही, रौतहट, काठमाडौँ, ललितपुर जिल्लामा पाँचसय भन्दा बढी सङ्क्रमित रहेका छन् ।
सङ्क्रमित शुन्य भएका जिल्ला
नेपालमा दुईवटा जिल्लाहरू सङ्क्रमित शून्य रहेका छन् । मुस्ताङ र हुम्ला मात्र अहिले सङ्क्रमित शून्य भएका छन् ।
आठ जनाको मृत्यु
नेपालमा २४ घण्टामा सङ्क्रमित पाँच महिलासहित आठ जनाको मृत्यु भएको छ । योसँगै नेपालमा मृत्यु हुने १८३ पुगेको छ । नेपालमा कुल सङ्क्रमितको अनुपातमा मृत्यु हुने प्रतिशत शून्य दशमलब ५२ प्रतिशत रहेको स्वास्थ्य तथा जनसङ्ख्या मन्त्रालयका प्रवक्ता डा. जागेश्वर गौतमले बताउनुभयो ।
काठमाडौँ उपत्यकाका थप ३७७ जनामा कोरोना सङ्क्रमण पुष्टि
काठमाडौँ उपत्यकामा कोरोना भाइरसका ३७७ सङ्क्रमित थपिएका छन् । स्वास्थ्य तथा जनसङ्ख्या मन्त्रालयले काठमाडौँ उपत्यकामा पछिल्लो चौबीस घण्टामा कोरोना भाइरसका ३७७ सङ्क्रमित थपिएको जनाएको छ ।
मन्त्रालयले दैनिक प्रेस ब्रिफिङ्को क्रममा उपत्यकाको तीन जिल्लामध्ये काठमाडौँमा २७०, ललितपुरमा ६६ र भक्तपुरमा ४१ जना सङ्क्रमित थपिएको जनाएको छ ।
यसअघि बुधबार उपत्यकामा २४ घण्टामा अहिलेसम्मकै सबैभन्दा बढी ३०१ जना सङ्क्रमितको पुष्टि भएको थियो ।