थप दुई हजार ७२२ सङ्क्रमित, तीन हजार ३०७ निकाे भए; काठमाडौं उपत्यकामा एक हजार ६३८ मा सङ्क्रमण पुष्टि
काठमाडौं, असोज १७ गते । नेपालमा कोरोना भाइरसका दुई हजार ७२२ थपिएका छन् । पछिल्लो २४ घण्टामा १४ हजार ७३९ वटा आरटी पीसीआर परीक्षणमा याे संख्यामा सङ्क्रमित थपिएका हुन् । योसँगै नेपालमा कुल आरटी पीसीआर परीक्षण दशलाख ४८ हजार ६८६ पुगेको छ ।
मन्त्रालयले दैनिक प्रेस ब्रिफिङ्को क्रममा हाल नेपालमा २१ हजार २३४ जना सक्रिय सङ्क्रमित रहेको जनाएको छ । थपिएका नयाँ सङ्क्रमितसँगै नेपालमा कुल सङ्क्रमितको संख्या ८२ हजार ४५० पुगेको छ ।
संक्रमणमुक्त
पछिल्लो चौबीस घण्टामा तीन हजार ३०७ जना कोरोनाभाइरस सङ्क्रमित निको भएर घर फर्केका छन् ।
हालसम्म ६० हजार ६९६ जना सङ्क्रमित निको भएका छन् । योसँगै नेपालमा कोरोनाबाट संक्रमणमुक्त हुने ७३.६३ प्रतिशत पुगेको छ ।
आइसोलेसनमा २१ हजार २३४ जना र क्वारेन्टाइनमा चार हजार ८८५ जना छन् ।
उपचार
नेपालमा २१० जना आसीयू र २९ जना भेन्टिलेटरमा रहेर उपचार गराइरहनुभएकाे छ ।
मृत्यु
पछिल्लो चौबीस घण्टामा ११ जना सङ्क्रमितको निधन भएको छ । योसँगै नेपालमा अहिलेसम्म कोरोनाका कारणले मृत्यु हुनेको संख्या ५२० पुगेको छ । याेसँगै मृत्युदर शून्य दशमलब ६३ पुगेको छ ।
काठमाडौं उपत्यकामा एक हजार ६३८ मा सङ्क्रमण पुष्टि
काठमाडौं उपत्यकामा कोरोनाभाइरसका एक हजार ६३८ जनामा सङ्क्रमणको पुष्टि भएको छ । स्वास्थ्य तथा जनसंख्या मन्त्रालयका अनुसार पछिल्लो चौबीस घण्टामा उपत्यकाका तीन जिल्लामा अहिलेसम्मकै सबैभन्दा बढी सङ्क्रमित थपिएका हुन् ।
मन्त्रालयले काठमाडौंमा एक हजार २८०, ललितपुरमा १६२ र भक्तपुरमा १९६ मा सङ्क्रमणको पुष्टि भएको जनाएको छ । काठमाडौंमा ४७० महिला र ८१० पुरुष, ललितपुरमा ७७ महिला र ८५ पुरुष तथा भक्तपुरमा ८० महिला र ११६ पुरुष सङ्क्रमित थपिएका हुन् ।