२४ घण्टामा २१३ संक्रमित थपिए : दुई जनाको मृत्यु; हुम्लामा ८६ प्रतिशत बालबालिकाले लगाए मोडर्ना खोप
काठमाडौँ, पुस १८ गते । पछिल्लो २४ घण्टामा थप २१३ जनामा कोरोना संक्रमण पुष्टि भएको छ ।
स्वास्थ्य तथा जनसंख्या मन्त्रालयका अनुसार पाँच हजार ९६२ जनाको पीसीआर परीक्षण गर्दा आइतबार २१३ जनामा संक्रमण पुष्टि भएको हो । त्यसैगरी १६ सय ६९ जनाको एन्टीजेन परीक्षण गर्दा तीन जनामा संक्रमण पुष्टि भएको छ ।
मन्त्रालयका अनुसार २४ घण्टामा थप दुई जनाको मृत्यु भएको छ । योसँगै नेपालमा कोरोनाले मृत्यु हुनेको संख्या ११ हजार ५९६ पुगेको छ । देशभर अहिले सक्रिय संक्रमितको संख्या चार हजार ९ सय ७१ रहेको छ।
हुम्लामा ८६ प्रतिशत बालबालिकाले लगाए मोडर्ना खोपको पहिलो मात्रा
जिल्लाका सात वटै गाउँपालिकाका छयासी प्रतिशत तोकिएका उमेर समूहका बालबालिकालाई मोडर्ना खोपको पहिलो मात्रा लगाउने कार्य सम्पन्न भएको छ । सडक यातायात नपुगेका स्थानमा स्वास्थ्यकर्मीहरु पैदल हिँडेर दुर्गम बस्तीमा सञ्चालन भएका खोप केन्द्रहरुमा सो खोप लगाउने कार्य भएको हो ।
नाम्खा गाउँपालिकाका स्वास्थ्य संयोजक ग्याछो लामाले एक वटा वडामा बाहेक बाँकी पाँच वटा वडामा ३३१ जना बालबालिकालाई मोडर्ना खोप लगाउने कार्य सम्पन्न भएको बताउनुभयो । उहाँले यसका लागि स्वास्थ्यकर्मीहरु दुर्गमका बस्तीमा पुगेर खोप लगाउने कार्य गरिएको बताउनुभयो ।
स्वास्थ्य सेवा कार्यालयमा खोप सम्पर्क व्यक्ति मानबहादुर रोकायाले जिल्लाका सात वटै गाउँपालिकामा छयासी प्रतिशत बालबालिकाले खोप लगाउने कार्य पूरा भएको बताउनुभयो । उहाँले बाँकी १४ प्रतिशतमा पनि केही मात्र छुटेको हुन सक्ने भए पनि अधिकांश बालबालिका जिल्ला बाहिर रहेको बताउनुभयो । खोप अभियानमा जिल्ला भर पाँच हजार ४६५ जना बालबालिकाहरुले खोप लगाउने कार्य भएको छ । जम्मा खोप लगाउनेमध्ये बालक संख्या दुई हजार पाँच सय रहेको छ भने बालिका सङ्ख्या दुई हजार ९६५ जना छ ।
यसबाट बालकभन्दा खोप लगाउने सङ्ख्या बालिकाको रहेको छ । यसका लागि केन्द्रबाट जिल्लाका लागि ६३० भाइलबाट छ हजार ३७० मात्रा बालबालिकाका लागि लगाउन सकिने खोप जिल्लामा उपलब्ध भएको थियो । जिल्लामा आएको सबै खोप गाउँपालिकालाई वितरण गरिएको हो । यसका लागि ६१ वटा खोप केन्द्र सञ्चालन गरेर १८३ जना स्वास्थ्यकर्मी तथा स्वास्थ्य स्वयंसेविका परिचालन गरिएको थियो ।
लिमी बाहेक सबै गाउँपालिकाका १२ देखि १७ वर्ष उमेर समूहका बालबालिकालाई खोप लगाएर ९०५ मात्रा अझै बचेको कार्यालयले जनाएको छ । यसबाट तत्काल छुटपुटका लागि पुनः खोप कार्य सुरु गरिने भएको छ । खोप अभियान सञ्चालन गर्ने निर्धारित मिति पुस ४ गतेबाट भए पनि खोप जिल्लामा ढिलो पुगेको कारण एकदेखि तीन दिन ढिलो गरी हुम्लामा खोप अभियान सञ्चालन भएको थियो ।