स्थानीय तह निर्वाचनसम्बन्धी सुरक्षा योजना पेश गर्न सुरक्षा निकायलाई निर्देशन
काठमाडौं, माघ १९ गते । केन्द्रीय सुरक्षा समितिको बैठकले स्थानीय तह निर्वाचनसम्बन्धी कार्ययोजना पेश गर्न चारवटै सुरक्षा निकायलाई निर्देशन दिएको छ । बुधबार दिउँसो गृहमन्त्री बालकृष्ण खाँणको अध्यक्षतामा बसेको बैठकले चारवटै सुरक्षा निकायलाई उक्त निर्देशन दिएको गृह मन्त्रालयका प्रवक्ता फणिन्द्रमणी पोखरेलले जानकारी दिनुभयो ।
साथै, नेपाल प्रहरी र सशस्त्र प्रहरीसहित सुरक्षा निकायलाई निर्वाचन सुरक्षा योजना बनाएर ल्याउन निर्देशन दिएको उहाँले बताउनुभयो । चारै सुरक्षा निकायले सुरक्षा योजना बनाएर ल्याएपछि अर्को बैठक बस्ने समेत उहाँले बताउनुभयो निर्वाचन आयोगले २०७९ जेठ ४ गते स्थानीय तहको निर्वाचन गर्न सरकार समक्ष सिफारिस गरेको छ । सोही अनुसार निर्वाचनमा सुरक्षा भरपर्दो दिनका लागि आवश्यक सबै रणनीति अख्तियार गर्न बैठकले निर्देशन दिएको उहाँले बताउनुभयो ।
‘अहिलेका हाम्रा सुरक्षा इस्युहरू के हुन्, ती इस्युहरूलाई कसरी सम्बोधन गर्ने भन्ने विषयमा छलफल भयो । र, प्रधानमन्त्री र निर्वाचन आयोगबीच जेठ ४ गते चुनाव गर्ने अनौपचारिक रूपमा कुरा भइराखेको रैछ । अब हामीले सुरक्षा कसरी निर्वाचनमा, कुन किसिमले सुरक्षा गर्ने, सबै सुरक्षा निकायबाट त्यसको फिडब्याक लिएर अगाडि बढ्ने भन्ने विषयमा छलफल भयो । निर्वाचन केन्द्रित सुरक्षा योजना कसरी तयार गर्ने, जनशक्तिको व्यवस्थापनलगायतको विषयमा छलफल भयो,’ प्रवक्ता पोखरेलले भन्नुभयो ।
बैठकमा गृहसचिव टेकनारायण पाण्डे, नेपाली सेनाका रथी बालकृष्ण कार्की, प्रहरी महानिरीक्षक शैलेश थापा क्षत्री, सशस्त्र प्रहरी महानिरीक्षक शैलेन्द्र खनाल र राष्ट्रिय अनुसन्धान विभागका प्रमुख यदुलाल खरेलको उपस्थिति थियो ।