स्थानीय तह निर्वाचनका लागि बिहीबारदेखि दल दर्ता; करिब एक लाख म्यादी आवश्यक पर्ने
काठमाडौं, फागुन ४ गते । निर्वाचन आयोगले बिहीबारदेखि दल दर्ताका लागि आह्वान गरेको छ । आगामी वैशाख ३० मा हुने स्थानीय तहको निर्वाचनको लागि बिहीबारदेखि फागुन १५ सम्म दल दर्ता गर्न सकिने आयोगले जनाएको छ । आयोगमा १ सय ६ वटा दल दर्ता भएका छन् ।
आयोगले स्थानीय तह निर्वाचनका लागि संविधानको धारा २७१ बमोजिम राजनीतिक दलसम्बनधी नियमावली २०७४ को अनुसूची १२ बमोजिमको ढाँचामा दल दर्ता गर्ने आह्वान गरेको हो । निवेदनको ढाँचा आयोगको वेबसाइटबाट डाउनलोड गर्न वा आयोग सचिवालयबाट प्राप्त गर्न सकिने समेत आयोगले जनाएको छ ।
दल दर्ताका लागि निवेदन दिँदा दलसम्बन्धी विवरण राजनीतिक दलको पूरा र संक्षिप्त नाम, स्थापना भएको मिति, आयोगमा दर्ता भएको मिति, केन्द्रीय कार्यालय रहेको ठेगाना, पत्राचार गर्ने ठेगाना, टेलिफोन नम्बर, इमेल र वेबसाइ खुलाउनुपर्ने आयोजले जनाएको छ ।
त्यस्तै, दलको केन्द्रीय कार्यकारिणी समिति, प्रदेश र जिल्ला समितिका पदाधिकारी तथा सदस्यको सङ्ख्या, आयोगमा दलले वार्षिक लेखापरीक्षण प्रतिवेदन पेश गरेको मिति र दलको केन्द्रीयस्तर, प्रदेशस्तर र जिल्लास्तरको कार्यकारिणी समितिको पछिल्लो निर्वाचन भएको मिति पनि खुलाउनुपर्नेछ । साथै यसभन्दा अघिको स्थानीय तहको निर्वाचनमा प्राप्त गरेको निर्वाचन चिन्हको सट्ट अर्को निर्वाचन चिन्ह लिन चाहने दलले आफूले प्राप्त गर्न चाहनेको तीन वटा निर्वाचन चिन्ह प्राथमिकता क्रम अनुसार उल्लेख गर्नुपर्नेछ ।
यसैगरी, राजनीतिक दलको संगठनात्मक स्वरुप ९केन्द्रीयस्तर, प्रदेशस्तर र जिल्लास्तर छ–छैन खुलाउने र स्थानीय तहको निर्वाचनमा भाग लिन चाहेको जिल्ला पनि दल दर्ता गर्दा खुलाउनुपर्ने आयोगले जनाएको छ ।
आयोगले निर्वाचन प्रयोजनाको लागि दल दर्ता गर्न केन्द्रीय समितिबाट भएको निर्णयको प्रतिलिपि, दलको विधान, नियमावली, तथा घोषणापत्र, निर्वाचन चिन्हको नमूना र सोको विद्युतीय प्रतिका कागजत पनि संलग्न गर्नुपर्नछ ।
त्यस्तै, आव २०७७/०७८ को वार्षिक लेखा परीक्षण प्रतिवेदन, आर्थिक वर्ष २०७६/७७ मा एकीकरण भई वा गाभिई नयाँ कायम भएका दलले आर्थिक वर्ष २०७६/७७ को लेखा परीक्षण प्रतिवेदन पेश गर्दा एकीकरण वा गाभिनुपूर्वका दलको विवरण समेत देखिने गरी तयार गरिएको वार्षिक लेखा परीक्षण प्रतिवेदन, आर्थिक वर्ष २०७७/७८ मा एकीकरण भई वा गाभिई नयाँ कायम भएका दलले आर्थिक वर्ष २०७६/७७ को लेखा परीक्षण प्रतिवेदन पेश गर्दा साविकमा अलग/अलग रहेको दलको वार्षिक लेखा परीक्षण प्रतिवेदन पेश गर्नुपर्नेछ ।
स्थानीय तह निर्वाचनका लागि करिब एक लाख म्यादी आवश्यक पर्ने
स्थानीय तह निर्वाचनका लागि एक लाख बढी म्यादी प्रहरी भर्ना गर्ने तयारी भएको छ । प्रहरी प्रधान कार्यालय नक्साले आगामी वैशाख ३० गते हुने स्थानीय तह निर्वानचको लागि करिब एक लाख बढी म्यादी प्रहरी आवश्यक पर्ने आकलन गरेको छ ।
प्रहरी पधान कार्यालयका प्रहरी वरिष्ठ उपरीक्षक एवं प्रवक्ता विष्णुकुमार केसीले देशभर एकै चरणमा चुनाव गर्दा धेरै म्यादी प्रहरी आवश्यक हुने हुँदा सोही अनुसार तयारी भइरहेको बताउनुभयो ।
स्थानीय हत निर्वाचनको सुरक्षाका लागि नेपाल प्रहरी तयार रहेको र म्यादी प्रहरी भर्ना गर्नेबारे तयारी भइरहेको प्रवक्ता केसीको भनाइ छ ।
उहाँका अनुसार निर्वाचनका लागि भर्ना हुने म्यादी प्रहरीले ५० दिनको सेवा सुविधान पाउने छन् । ‘स्थानीय तह निर्वाचनमा करिब एक लाख बढी म्यादी प्रहरी आवश्यक पर्ने अनुमान गरेको छौं । म्यादी भर्नाका लागि तयारी भइसकेको छ । यसको लागि केही समय लाग्छ । भर्ना हुने म्यादीले ५० दिनको सेवा सुविधा पाउने छन्,’ उहाँले भन्नुभयो ।
५० दिनका लागि भर्ना भएका म्यादी प्रहरीले चुनाव सकिएको ८–१० दिनसम्म काम गर्न पाउने प्रवक्ता केसीको भनाइ छ ।
, २०७४ मा दुई चरणमा स्थानीय तह निर्वाचन भएको थियो । सो निर्वाचनमा ७५ हजार म्यादी प्रहरी परिचालन गरिएको थियो । साथै सरकारले दुई लाख २६ हजार सुरक्षाकर्मी परिचालन गरेको थियो ।
त्यसबेलाको स्थानीय तह निर्वाचनमा सरकारले नेपाली सेनालाई बाहिरी घेरामा परिचालन गरेको थियो भने पहिलो घेरामा नेपाल प्रहरी र दोस्रोमा सशस्त्र प्रहरी परिचालन गरिएको थियो ।
यता, गत माघ १९ गते बसेको केन्द्रीय सुरक्षा समितिको बैठकले स्थानीय तह निर्वाचनका लागि आवश्यक सुरक्षा योजना बनाएर पेश गर्न चार वटै सुरक्षा निकायलाई निदेएशन दिएको थियो ।