प्रधानमन्त्री प्रचण्डद्वारा द्रुतमार्गको निरीक्षण
राममणि दाहाल / हेटौँडा, वैशाख ५ गते । प्रधानमन्त्री पुष्पकमल दाहाल ‘प्रचण्ड’ ले निर्माणाधीन निजगढ–मकवानपुर–काठमाडौँ द्रुतमार्गको अवलोकन–निरीक्षण गर्नुभएको छ । प्रधानमन्त्री दाहालसहित उपप्रधान एवम् रक्षामन्त्री पूर्णबहादुर खड्का, अर्थमन्त्री डा. प्रकाशशरण महत, भौतिक पूर्वाधार तथा यातायातमन्त्री प्रकाश ज्यालासहितको टोलीले मङ्गलबार मकवानपुरको विभिन्न स्थानमा निर्माणाधीन द्रुतमार्गको निरीक्षण गर्नुभएको हो ।
नेपाली सेनाको हेलिकोप्टरबाट द्रुतमार्ग निरीक्षणका लागि आउनुभएका प्रधानमन्त्री र मन्त्रीहरूसहितको टोलीले भीमफेदी गाउँपालिका –८ स्थित महादेवटार र मकवानपुरगढी –१ मा निर्माण भइरहेको सुरुङ तथा बकैया गाउँपालिका –५ स्थित पावस नजिकै बकैया खोलामा निर्माण भइरहेको पुलको निरीक्षण गर्नुभएको छ ।
अवलोकनका क्रममा प्रधानमन्त्रीसहित मन्त्रीहरूको टोली बकैया गाउँपालिका –५ स्थित पावसमा बकैया खोलामा निर्माणाधीन पुलको निरीक्षणका क्रममा नेपाली सेनाका प्रधानसेनापति प्रभुराम शर्मा, द्रुतमार्गको प्याकेज ३ का प्रोजेक्ट म्यानेजर देवेन्द्र ढुङ्गानाले सडक र पुलको निर्माण अवस्थाबारेमा जानकारी दिनुभयो । तराई–मधेशलाई मकवानपुर हुँदै काठमाडौँसँग जोड्ने उक्त सडक नेपाली सेनाले निर्माण गरिरहेको छ ।
निरीक्षणमा बागमती प्रदेशका मुख्यमन्त्री सालिकराम जम्कट्टेल, प्रदेशका मन्त्रीहरू, मकवानपुरका प्रमुख जिल्ला अधिकारी राजेन्द्रदेव पाण्डे, बागमती प्रदेश प्रहरी कार्यालयका प्रमुख प्रहरी नायव महानिरीक्षक किरण राणालगायत सरकारी र सुरक्षा निकायका उच्च अधिकारीहरूको सहभागिता थियो ।