तोरीको तेल गाउँमै खपत
गोकर्ण पौडेल / तुलसीपुर, असोज ८ गते । तुलसीपुर उपमहानगरपालिका वडा २ मा रहेको दर्पण कृषि सहकारी संस्थाले गाउँमै उत्पादन भएको तोरीलाई गाउँमै खपत गर्न सुरु गरेको छ । सहकारी संस्थाले तेल उत्पादनका लागि मिल र तेल प्रशोधन केन्द्र सञ्चालनमा ल्याएको हो ।
प्रधानमन्त्री कृषि आधुनिकीकरण परियोजना अन्तर्गत तोरीजोन कार्यक्रम अन्तर्गत तेल प्रशोधन केन्द्र सञ्चालनमा ल्याइएको छ । परियोजनाको ५० प्रतिशत र सहकारी संस्थाको १९ लाख ६६ हजार आठ सय २६ रुपियाँको लागतमा तेल उत्पादन मिल सञ्चालनमा ल्याइएको हो ।
तोरीजोन अन्तर्गत तुलसीपुर उपमहानगरपालिकाको १ र २ नम्बर वडामा कार्यक्रम लागु भएको छ । परियोजना दाङका प्रमुख महेश रेग्मीले तोरी बाली विशिष्टीकृत बालीका रुपमा भएकाले तोरी संकलन गरेर तेल उत्पादन गर्दा सहकारी संस्थाले उपभोक्तालाई सहुलियत मूल्यमा तेल बिक्री गर्न सक्ने बताउनुभयो ।
तेल उद्योगलाई ठूलो उद्योगका रुपमा विकास गर्न नेपाल सरकारबाट उत्पादित तेलको गुणस्तर कायम गरेर बिक्री गर्न आग्रह गर्नुभयो । सहकारी संस्थाका उपाध्यक्ष शालिकराम सुनारले किसानबाट उत्पादन भएको तोरी संकलन गरेर उपभोक्तालाई शुद्ध तोरीको तेल सहुलियतमा बिक्री गरिने बताउनुभयो ।
तोरीको तेल बजारमूल्य तीनसय पचास रहेको र सहकारीबाट उत्पादन भएको तेल प्रतिलिटर ३०० मा बिक्री उपाध्यक्ष सुनारले बताउनुभयो ।
तुलसीपुर उपमहानगरपालिकाका नगरप्रमुख टीकाराम खड्काले विगतमा दाङको तोरी निकै लोकप्रिय रहेकाले सहकारी संस्थाले गुणस्तरीयता कायम राख्दै बिक्री गर्नका लागि आग्रह गर्नुभयो । उहाँले सहकारी संस्थाले उत्पादन गरेको तोरीको तेलको बजारीकरण र गुणस्तर कायम गर्नका लागि प्राविधिक र कानुनी सहयोग गर्ने बताउनुभयो ।