महिलालाई नौमती बाजा बजाउने तालिम
लीलाराज खड्का / बिर्तामोड, माघ २५ गते । शिवसताक्षी नगरपालिकाले नौमती बाजाको संरक्षण र प्रवर्धनका लागि महिलालाई नौमती बाजा बजाउने तालिम सुरु गरेको छ ।
झापामा पछिल्लो पटक कन्काई नगरपालिका र बिर्तामोड क्षेत्रका महिलाले तालिम लिएर व्यावसायिक रूपमै नौमती बाजा बजाउन सुरु गरेसँगै शिवसताक्षी नगरपालिकाले समेत यस प्रकारको तालिमको सुरुवात गरेको हो ।
नयाँ पुस्तामा नौमती बाजाप्रतिको घट्दो आकर्षण र ती बाजा बजाउने मानिसहरूको समेत अभाव भइरहेका बेला शिवसताक्षी नगरपालिकाबाट नौमती बाजाको संरक्षण र प्रवर्धनका लागि स्थानीय महिलालाई नौमती बाजा प्रशिक्षणको तालिम सञ्चालन गरिएको शिवसताक्षी नगरपालिकाका प्रमुख मेगाहाङ्ग थोप्राले बताउनुभयो ।
तालिमको उद्घाटन गर्दै नगर प्रमुख मेगाहाङ्ग थोप्राले आधुनिक बाजाको प्रभावले नेपाल र नेपालीको मौलिकता ओझेलमा परिरहेको महसुस गरी मौलिक बाजाको प्रशिक्षणमार्फत सांस्कृतिक जगेर्ना गर्न नगरपालिकाले तालिमको आयोजना गरेको बताउनुभयो । पछिल्लो समय नौमती बाजा कुनै एउटा समुदायले मात्र बजाउने प्रचलन हट्दै सबै समुदायले यसको संरक्षण र प्रयोग गर्न थालेकाले यसको व्यावसायिकतासँगै नौमती बाजाको संरक्षण हुनेमा आफ्नो विश्वास रहेको नगरप्रमुखको भनाइ छ ।
कला संस्कृतिको जगेर्नामा सबै जाति र समुदाय लिङ्गको दायित्व बराबरी हुनेभएकाले समेत महिलालक्षित तालिमको आयोजना गरिएको शिवसताक्षी नगरपालिकाका कार्यक्रम अधिकृत महेश लामिछानेले बताउनुभयो ।
महिलासँग उपमेयर कार्यक्रम अन्तर्गत गृहिणी महिलालाई आवश्यक ज्ञान सीप र प्रविधि समेत प्रदान गरी नेपाली मौलिकताको जगेर्ना गर्दै आर्थिक विकासमा महिलाको योगदान निर्दिष्ट गरी स्वावलम्बी बनाउने उद्देश्यकासाथ यो कार्यक्रम वार्षिक कार्यक्रममा समावेश गरिएको नगर उपप्रमुख नगरमाया कार्कीले जानकारी गराउनुभयो ।
कार्यक्रममा नगरपालिकाको २ लाख ५० हजार र सहभागीबाट ६५ हजार लागत सहभागितासहित २० जना सहभागीलाई १५ दिवसीय प्रशिक्षण प्रदान सुरु गरिएको छ । तालिम पश्चात् एक सेट नौमती बाजा समेत प्रदान गरिने जनाइएको छ ।