प्रणाली बिग्रिएपछि वैदेशिक रोजगार बोर्डबाट आर्थिक सहायता वितरण बन्द

काठमाडौँ, फागुन १ गते । वैदेशिक रोजगार बोर्डको अनलाइन प्रणाली अवरुद्ध भएको छ । बोर्डको सचिवालयले एक सूचना जारी गर्दै वैदेशिक रोजगारीमा गई मृत्यु भएका तथा अंगभंग भएका कामदार र परिवारलाई प्रदान गरिने आर्थिक सहायता वितरणमा प्रयोग हुने प्रणालीमा समस्या आएको जानकारी दिएको छ ।

बोर्ड सचिवालयको ‘एफईडब्लुआईएमएस डट एफईबी डट जीओभी डट एनपी’को सर्भर र सफ्टवेयर केही दिनदेखि समस्या आएको भन्दै संस्थाले केही दिन सेवा बन्द हुने जानकारी गराएको छ ।

सफ्टवेयरको सर्भरको मर्मतको काम भइरहेकोले फेरि सञ्चालनमा नआएसम्म वैदेशिक रोजगारीमा गई मृत्यु भएका तथा अंगभंग भएका कामदार र परिवारलाई प्रदान गरिने आर्थिक सहायता वितरण बन्द हुनेछ । बोर्डको प्रणालीमा समस्या आउँदा केही दिनदेखि सेवा प्रभावित छ ।