ट्रान्सपरेन्सीले भन्यो– भ्रष्टाचारको आरोप लागेका व्यक्तिसँग दान लिनु भ्रष्टाचारको पक्षपोषण गर्नु हो
काठमाडौँ , कात्तिक ५ गते । । भ्रष्टाचारविरुद्ध काम गर्दै आएको अन्तर्राष्ट्रिय संस्था ट्रान्सपरेन्सी इन्टरनेशनले दलको कार्यालय निर्माणका लागि भ्रष्टाचारको आरोप लागेका व्यक्तिको दान लिएको प्रति गम्भीर चासो व्यक्त गरेको छ ।
टीआई नेपालका तर्फबाट एक विज्ञप्ति जारी गर्दै नेकपा एमालेले किर्तिपुरमा निर्माण गर्न लागेको भवनको जग्गा व्यवसायी मिनबहादुर गुरुङको दान लिएकोमा भ्रष्टाचारको पक्षपोषण गरेको ठहर गरेको छ ।
‘प्रतिवादीसँगको यस्तो लेनदेनका कारण स्वार्थको द्वन्द्व हुनगई सुशासनमा गम्भीर असर पर्ने र भ्रष्टाचारको पक्षपोषण हुने ठम्याइ टीआई नेपालको छ,’ विज्ञप्तिमा भनिएको छ, ‘ सरकारको नेतृत्व गर्ने व्यक्ति वा दलले सरकार वादी रहेको मुद्दाका प्रतिवादी व्यक्ति वा पक्षबाट सरकारको लागि होस् वा पार्टीको नाममा होस् कुनै पनि प्रकारको दान, दातव्य र सहयोग स्वीकार गर्ने प्रवृत्तिले सुशासनको अपव्याख्या भई देशमा व्याप्त भ्रष्टाचारलाई थप मलजल पुग्न जाने देखिन्छ ।’ सरकार सञ्चालनमा संलग्न रहेका व्यक्ति तथा राजनीतिक दललाई यस प्रकारका काम कारबाहीबाट अलग रहन टीआई नेपालले अपिल गरेको छ ।
हाल सरकारको नेतृत्व गरिरहेको एमालेको पार्टी कार्यालय भवन निर्माणको लागि १० रोपनी १४ आना जग्गा दान गरिएको र सो जग्गामा दाताकै तर्फबाट भवन निर्माण समेत दानको रूपमा गरिदिने भन्ने समाचारतर्फ ट्रान्सपरेन्सी इन्टरनेशनल (टीआई) नेपालको गम्भीर ध्यानाकर्षण भएको भन्दै यस्तो दान नलिन आग्रह गरेको छ।
‘ दान प्रदान गर्ने व्यक्ति नेपाल सरकार वादी रहेका विभिन्न मुद्दामा अदालतले दोषी ठहर गरेको र निजमाथि सोही प्रकृतिका थप विभिन्न मुद्दाहरू न्यायिक प्रक्रियामा नै रहेको सर्वविदितै छ,’ विज्ञप्तिमा भनिएको छ, ‘कानुनको पालना गरी गराई सरकारी सम्पत्ति र हितको संवर्धन गर्न जनताबाट निर्वाचित भई सरकारको नेतृत्व गरिरहेको पार्टीले यस प्रकारको दान दातव्य लिँदा वादी–प्रतिवादीमा हुनुपर्ने व्यवहारमा गम्भीर असर पर्न गई सरकार वादी रहेको मुद्दामा प्रतिकूल प्रभाव पर्न जाने देखिन्छ ।’