नेपालमा १ लाख ४१ हजार होटल, वर्षमा कतिको गर्छन् कारोबार ?
काठमाडौँ, पुस १७ गते । नेपालमा होटल तथा रेष्टुरेन्टको संख्या १ लाख ४० हजार भन्दा माथि पुगेको छ । राष्ट्रिय तथ्यांक कार्यालयले गरेको राष्ट्रिय होटल तथा रेष्टुरेन्ट सर्भेक्षणले यो अवस्था देखाएको हो ।
कार्यालयले आर्थिक वर्ष २०७९/८० मा गरेको उक्त सर्भेक्षणमा कुल १ लाख ४१ हजार २२३ वटा आवास तथा भोजन सेवासँग सम्वन्धित प्रतिष्ठानहरु रहेको उल्लेख गरिएको छ । ती संस्थाहरुमा कुल ३ लाख ८७ हजार ७४७ जना आवद्ध भएको सर्भेक्षणले देखाएको छ । यो सो क्षेत्रका आवद्ध व्यवसायी तथा उनीहरुका साझेदार, वेतलबी पारिवारिक सदस्यहरु र तलबी रोजगार व्यक्तिको समेत संख्या हो ।
यो संख्यामध्ये १ लाख ६ हजार ४५९ जना मात्रै तलबी कर्मचारी भएको प्रतिवेदनले देखाएको छ । नेपाल स्ट्यान्डर्ड औद्योगिक वर्गीकरणको ‘आई’ खण्ड अन्तर्गत पर्ने अल्पकालीन आवास सुविधा प्रदान गर्ने वा जुनसुकै प्रकारको भोजन सेवा उपलव्ध गराउने प्रतिष्ठान यस अन्तर्गत रहेको कार्यालयले जनाएको छ ।
यी प्रतिष्ठानहरुमा होटल, रिसोर्ट होटल, अपार्टमन्ट होटल, मोटल, मोटर होटल, पाहुनाघर, धर्मशाला, पेन्सन्स आवास, बिछौना र खाजा, हेलिडे होम, कटेज क्याबिन, यूवा आवास तथा हिमाली आश्रय लगायत रहेका छन् । पाँचतारे होटलदेखि सडकको छेउमा हुने खाजा पसलसम्म यस अन्तर्गत समावेश गरिएको कार्यालयका निर्देशक राजेश धितालले जानकारी दिए ।
नेपालका होटल, रेष्टुरेन्टले वर्षमा कतिको गर्छन् कारोबार ?
नेपालमा सञ्चालित होटल र रेष्टुरेन्टले सवा ३ खर्ब रुपैयाँ बराबरको वस्तु तथा सेवाको बिक्री गर्ने देखिएको छ । राष्ट्रिय तथ्यांक कार्यालयले सार्वजनिक गरेको राष्ट्रिय होटल तथा रेष्टुरेण्ट सर्वेक्षणले यो अवस्था देखाएको हो ।
यसमध्ये यसरी सेवा प्रवाह गरेका कम्पनीहरुको लागत २ खर्व १६ अर्ब ७३ करोड ८३ लाख मूल्य बराबर हुन आउँछ । यो हिसाबले उनीहरुले वार्षिक १ खर्ब ९ अर्ब २७ करोड १ लाख बराबरको मूल्य अभिवृद्धि गर्ने गरेको अवस्था देखिन्छ ।
२०८० मा गरिएको उक्त सर्भेक्षणले यस्ता व्यवसायिक प्रतिष्ठानको संख्या १ लाख ४२ हजार २२३ रहेको र उनीहरुको कुल स्थायी सम्पत्ति ५ खर्व ४३ अर्ब २५ करोड ८२ लाख रहेको देखाएको छ ।