रत्ननगर (चितवन), ८ कात्तिक । चितवनमा यसवर्ष पशुविकास सेवा अन्तरगत बाख्रा र बङ्गुरपालन विकासका लागि जिल्ला पशु सेवा कार्यालयमा नयाँ कार्यक्रम आएको छ ।

पशुविकास सेवाको केन्द्रीय कार्यक्रम अन्तरगत बाख्रा र बङ्गुरपालन विकासका लागि रु २५ लाख रकमको नयाँ कार्यक्रम आएको पशु सेवा कार्यालय चितवनका प्रमुख डा रामकुमार कार्कीले जानकारी दिनुभयो ।

यसवर्ष बाख्रा विकासका लागि रु आठ लाख र बाँकी रकम बङ्गुरपालनमा खर्च गरिने छ । मुख्य गरी चितवनको पहाडी भेगमा बाख्रापालन र तराई क्षेत्रमा बङ्गुर पालन सफल भएको कार्कीले बताउनुभयो ।

अहिले जिल्लामा करिव साढे दुई लाख बाख्रा पालिएको छ । यस्तै १० हजारभन्दा बढी बङ्गुर पालिएको अनुमान छ ।

जिल्लामा बङ्गुरको मासु र पाठा उत्पादन गरी बिक्री वितरण हुँदै आएको छ । व्यावसायिक बङ्गुरपालनमा करिव ४० जना किसान सक्रिय भएको उहाँको भनाइ छ । दक्षिण माडीमा समेत बाख्रापालन प्रभावकारी हुँदै आएको कार्यालयले जनाएको छ ।

पशु विकासका लागि जिल्लामा केन्द्रीय कार्यक्रम अन्तरगत रु एक करोड दुई लाख बजेट आएको छ । यी दुई वटा कार्यक्रममा रु २५ लाख खर्च हुने छ । अन्य कार्यक्रम भने अघिल्लो वर्षकै निरन्तरता हो ।

यो वर्ष पशु आहार राष्ट्रिय अभियानका लागि रु २२ लाख, बाख्रा प्रवद्र्धनमा चार लाख, गाईभैँसी विकास कार्यक्रममा रु ३३ लाख, गाई श्रोत केन्द्र र पाडा हुर्काउने कार्यक्रमका लागि रु १२ लाखको बजेट आएको पशुसेवा कार्यालय चितवनले जनाएको छ ।

यस अतिरिक्त पशुस्वास्थ्य सेवाका लागि रु नौ लाख र पशुपक्षी बजार प्रवद्र्धनका लागि रु १६ लाख रकम केन्द्रबाटै आएको छ । रासस