काठमाडौँ, १५ कात्तिक । भारतले अघोषित रूपमा गरेको नाकाबन्दीका कारण जनताको दैनिक उपभोग्य वस्तुमा अत्यधिक कालोबजारी हुँदासमेत सम्बन्धित निकायले अनुगमन नगरेको भन्दै सर्वसाधारणले गुनासो गरेका छन् ।

दाल, चामल, चिनी, नुन, खाने तेल, चाउचाउ, बिस्कुटलगायत दैनिक उपभोग्य वस्तुमा पसलवालाले मनपरी दोब्बर, तेब्बर मूल्य लिँदा पनि अनुगमन गर्ने निकायले कुनै चासो नदेखाएको सर्वसाधारणको भनाइ छ ।

घट्टेकुलो बस्ने सीता रायमाझीले किराना पसलमा प्राप्त सामान हुँदाहुँदै सामान सटेज भएको भन्दै रु ७० पर्ने आधा लिटर खाने तेललाई रु १५० सम्ममा बेचिरहेको बताउनुभयो । अनामनगर बस्ने शान्ता थापाले घरमा आवश्यकता परेपछि चिनीको मूल्य पर्नेभन्दा दोब्बर मूल्य तिर्नुपरेको गुनासो गर्नुभयो ।

उहाँका अनुसार पसलमा जति पनि मौज्दात सामान रहेको हुन्छ तर, बजारमै सामान सटेज छ भनेर पसलवालाले दोब्बर, तेब्बर मूल्य बढाएको हुन्छ । नेपालमा संविधान जारी भएलगत्तै एक महिनाअघिदेखि भारतले नाकाबन्दी गरेपछि ग्यास र इन्धनको अभावमा हरेकजसो सामानमा कालो बजारी हुँदै आएको पाइन्छ । ग्यासको अभाव भए पनि मानिसले होटल र घरमा समेत दाउरा बालेर खाना पकाउँदै आएका छन् ।

पेट्रोलका लागि तीन दिनदेखि भद्रकाली पेट्रोल पम्पमा लाइन बस्नुभएका ट्याक्सी चालक सन्दीप शर्माले पम्प बाहिरबाट बेचिने मिसावट पेट्रोल हालेर गाडी चलाउँदा स्टाट नै बन्द भएर इन्जिनले कामै गर्न छाडेको गुनासो गर्नु भयो । “यसरी जथाभावी रूपमा मिसावट डिजल÷पेट्रोल बेच्ने व्यक्तिलाई सरकारले कारबाही गर्नुपर्छ” – उहाँले भन्नुभयो ।

वाणिज्य तथा आपूर्ति व्यवस्थापन विभागका महानिर्देशक शम्भु कोइरालाले खाने तेलको आपूर्ति कम भएका कारण केही मूल्य वृद्धि भएको हुन सक्छ तर खरिद मूल्यको अनुपातमा अत्यधिक मूल्य वृद्धि गर्न पाइँदैन, त्यसो गरेको पाइएमा कानुनी कारबाही हुन्छ भन्नुभयो ।

दोब्बर तेब्बर मूल्य वृद्धि गर्ने व्यक्तिलाई विभागले सूचनाको आधारमा कारबाहीसमेत गर्दै आएको उहाँको भनाइ छ ।  उपभोक्ता अधिकार अनुसन्धान मञ्चका अध्यक्ष माधव तिमिल्सिनाले मूल्य वृद्धि भएर बजार राज्यको नियन्त्रणबाट बाहिर गइसकेको अवस्था हुँदासमेत राज्यका सबै संयन्त्र आँखा चिम्लेर बसेको आरोप लगाउनुभयो । रासस