उपराष्ट्रपतिद्वारा पद तथा गोपनीयताको शपथ, पदभार ग्रहण ; राष्ट्रपतिका उम्मेदवार गुरुङबाट धन्यवाद
काठमाडौँ, १५ कात्तिक । राष्ट्रपति विद्यादेवी भण्डारीले नवनिर्वाचित उपराष्ट्रपति नन्दबहादुर पुनलाई पद तथा गोपनीयताको शपथ गराउनुभएको छ ।
राष्ट्रपति कार्यालय शीतलनिवासमा आज आयोजित विशेष समारोहमा प्रधानमन्त्री केपी शर्मा ओली, सभामुख ओनसरी घर्ती, प्रधानन्यायाधीश कल्याण श्रेष्ठ, उपप्रधानमन्त्री कमल थापा, विजयकुमार गच्छदार र टोपबहादुर रायमाझी, पूर्वप्रधानमन्त्री, मन्त्री, सांसद, उद्योगीव्यवसायी एवम् यहाँस्थित कूटनीतिक नियोगका प्रमुख तथा प्रतिनिधिको सहभागिता थियो ।
पुन व्यवस्थापिका–संसद्बाट शनिबार उपराष्ट्रपतिमा निर्वाचित हुनुभएको हो । पुनले अपराहृन बहादुर भवनस्थित उपराष्ट्रपति कार्यालयमा पुगेर पदभार ग्रहण गरेका छन् ।
पुनको पदभार ग्रहण लगतै निवर्तमान उपराष्ट्रपति परमानन्द झालाई विदाइ समेत गरिएको छ । सरकारी आयोजनामा भएको विदाइ कार्यक्रममा प्रधानमन्त्री केपी शर्मा ओलीले झालाई बुद्धको मूर्ति उपहार दिएका छन् । एमालेसहित सत्ता गठवन्धनको समर्थनमा पुन शनिबार उपराष्ट्रपति पदमा निर्वाचित भएका थिए ।
त्यसैगरी, राष्ट्रपतिको निर्वाचनमा पराजित कुलबहादुर गुरुङले राष्ट्रपतिमा विजयी विद्यादेवी भण्डारी र उपराष्ट्रपतिमा नन्दबहादुर बधाई तथा सफल कार्यकालको शुभकामना व्यक्त गर्नुभएको छ ।
आज विज्ञप्ति जारी गर्दै नेपाली काँग्रेसका केन्द्रीय सदस्य गुरुङले आफूलाई मतदान गर्ने व्यवस्थापिका–संसद्का सबै सांसदलाई धन्यवाद दिनाका साथै राष्ट्रपतिको उम्मेदवार बनाएकामा काँग्रेसका सभापति र केन्द्रीय कार्यसमितिका सदस्यप्रति समेत आभार र धन्यवाद प्रकट गर्नुभएको छ ।
आगामी दिनमा पनि राष्ट्र, राष्ट्रियता र नेपालीको बृहत्तर एकताका लागि निरन्तर क्रियाशील रहने प्रतिबद्धता व्यक्त गर्दै उहाँले आफूप्रति अगाध माया र स्नेह राख्नुभएका स्वदेश र विदेशमा रहनुभएका सम्पूर्ण नेपाली दाजुभाइ तथा दिदीबहिनीप्रति पनि नेता गुरुङले धन्यवाद व्यक्त गर्नुभएको छ । रासस