दोलखा, २१ कात्तिक । नवनियुक्त संस्कृति, पर्यटन तथा नागरिक उड्डयनमन्त्री आनन्दप्रसाद पोखरेलले दोलखाको पर्यटन विकासमा टेवा पु¥याउन जिल्लाको प्रसिद्ध धार्मिकस्थल भीमेश्वर मन्दिरलाई विश्वसम्पदा सूचीमा सूचीकृत गराउनका लागि पहल गर्ने बताउनुभएको छ ।

क्षेत्रीय होटल सङ्घ दोलखाको आयोजनामा आज सदरमुकाम चरीकोटमा आयोजित बधाई कार्यक्रममा मन्त्री पोखरेलले भीमेश्वर मन्दिरलाई विश्वसम्पदा सूचीमा सूचीकृत गर्नसके विदेशबाट समेत दोलखामा पर्यटक आउने र यहाँको समग्र विकास हुने बताउनुभयो ।

दोलखाको क्षेत्र नम्बर २ का सांसदसमेत रहनुभएका मन्त्री पोखरेलले दोलखा जिल्ला पर्यटनका लागि प्रचुर सम्भावना बोकेको जिल्ला भएकाले पर्यटकीय स्थलहरूको प्रचारप्रसारमा लाग्ने समेत बताउनुभयो ।

उहाँले देशको पर्यटन उद्योग भूकम्प र भारतको अघोषित नाकाबन्दीका कारण थला परेको भन्दै यसलाई माथि उकास्न आफूले विशेष प्याकेज ल्याउने जानकारी दिनुभयो । रासस