तुलसीपुर (दाङ), ३० कात्तिक । राप्ती अञ्चल अस्पताल तुलसीपुरको परिसरमा तुलसीपुर–५ निवासी समाजसेवी वामदेव शर्माले रक्तसञ्चार केन्द्र भवनको निर्माण गर्न लाग्नुभएको छ ।

उहाँले आफ्नी श्रीमती स्वर्गीय कालिकादेवी आचार्यको स्मृतिमा त्यहाँ रक्तसञ्चार केन्द्र निर्माण गर्न सुरु गर्नुभएको हो । विभिन्न सातवटा कोठा रहने गरी ६० लाख रुपैयाँ लागतमा( स्टिमेट ) गरेर काम अगाडि बढाइएको हालसम्म ६० प्रतिशत निर्माण कार्य सम्पन्न भइसकेको निर्माण समितिका सदस्यसचिव यज्ञ केसीले जानकारी दिनुभयो ।

आर्थिक अभाव र उचित स्थानमा जग्गाको उपलब्धता नभएका कारण देखाउँदै
लामो समयदेखि राप्ती अञ्चल अस्पताल परिसरमा रक्तसञ्चार केन्द्रको स्थापना हुन सकेको थिएन । शर्माले कालिकादेवी रक्तसञ्चार केन्द्र नामाकरण हुने गरी रक्तसञ्चार केन्द्रका लागि आवश्यक पर्ने सम्पूर्ण रकम आफँैले खर्च गर्ने गरी काम अगाडि बढाइएको र अहिले निर्माण समितिले कामलाई दु्रत गतिमा बढाएको पाउँदा खुसी लागेको बताउनुभयो ।

सोका लागि कालिकादेबी ब्लड बैंक निर्माण समितिसमेत गठन गरिएको छ । निर्माण समितिका संयोजकमा तुलसीपुर उद्योग वाणिज्य सङ्घका अध्यक्ष एवम् समाजसेवी बिमल रिजाल रहनुभएको छ । तुलसीपुर क्षेत्रमा ब्लड बैंक नहुँदा यस क्षेत्रका बिरामीले भोग्दै आएको समस्यालाई मध्यनजर गरी आफूहरुले दाताको खोजी गरेर रक्तसञ्चार केन्द्र भवन निर्माणको काम गरिरहेको निर्माण समितिका संयोजक रिजालले बताउनुभयो । रासस