अख्तियारद्वारा इन्धन अनियमितताबारे छानबिन सुरु
काठमाडौँ, ५ मङ्सिर । नेपाल आयल निगमले आयात गरेको इन्धन हराएको भन्दै गुनासो आएपछि अख्तियार दुरुपयोग अनुसन्धान आयोगले चासो व्यक्त गरेको छ ।
रुपन्देहीको भलबारी डिपोबाट निगमको थानकोट डिपोका लागि पठाइएको इन्धन निजी क्षेत्रका पेट्रोल पम्पलाई वितरण गरेको भन्ने गुनासो आएपछि आयोगले निगमका कार्यकारी निर्देशक गोपालबहादुर खड्का र निर्देशक मुकुन्द घिमिरेलाई बोलाएर सोधपुछ गरेको हो ।
सो डिपोबाट पठाइएको इन्धन काठमाडौँको एक पेट्रोल पम्पलाई गैरकानुनी तवरले वितरणका लागि पठाइएको भन्दै नेपाल प्रहरीले नियन्त्रणमा लिएको थियो । कुल १२ हजार लिटर डिजल कालोबजारी गर्न लागिएको भन्दै सोबारे गुनासो आएको थियो । यस्तै, आयात भएको इन्धन वितरणमा अनियमितता भएको र कालोबजारी बढेको विषयमा आयोगले चासो व्यक्त गरेको प्रवक्ता कृष्णहरि पुस्करले जानकारी दिनुभयो ।
उहाँले न्यायोचित र समानुपातिक वितरणका लागि निगमलाई आवश्यक निर्देशन दिइएको, त्यसो हुन नसकेको खण्डमा कारबाहीको भागिदारसमेत हुनुपर्ने भन्दै सचेत गराएको बताउनुभयो ।
उहाँले भन्नुभयो– “इन्धन आयात र वितरणको सन्दर्भमा आयोगले सूक्ष्म ढङ्गले अध्ययन गरिरहेको छ । दोषीलाई कानुनअनुसार कारबाही हुन्छ ।” आयोगले कालोबजारी नियन्त्रणका लागि आवश्यक कदम चाल्न नेपाल प्रहरी, सशस्त्र प्रहरी, वाणिज्य विभाग, नेशनल टे«डिङ लि र साल्ट टे«डिङ लिलाई निर्देशन दिइसकेको छ ।
नातागोता, शक्ति, पहुँच र प्रभावका आधारमा इन्धन वितरण नगर्न सम्बद्ध पक्षलाई निर्देशन दिइसकिएको प्रवक्ता पुस्करको भनाइ छ । यस्तै, मिलेमतोमा कारोबार भए वा गरिएको थाहा हुनासाथ सम्बन्धित निकायमा खबर गर्नसमेत आयोगले आग्रह गरेको छ । रासस