बेपत्ता व्यक्तिहरुको सम्झनामा प्रतीक्षालय निर्माण

बैतडी, ८ मङ्सिर । दश वर्षे सशस्त्र द्वन्द्वको समयमा बैतडीमा बेपत्ता भएका व्यक्तिहरुको सम्झनामा प्रतीक्षालय निर्माण गरिएको छ ।

नेपाल रेडक्रस सोसाइटी जिल्ला शाखाद्वारा सञ्चालित हातेमालो कार्यक्रमअन्तर्गत बैतडीको चौराहा स्यागैरमा निर्मित प्रतीक्षालयको सोमबार एक कार्यक्रमका बीच उद्घाटन गरिएको छ ।

कार्यक्रमको प्रमुख जिल्ला अधिकारी लीलामणि अधिकारीले दीप प्रज्वलन गरेर र सिलामा लेखिएका शब्दहरु उच्चारण गरी उद्घाटन गर्नुभएको थियो । जिल्लामा सशस्त्र सङ्घर्षका क्रममा विभिन्न परिवारका नौजना अझै बेपता भएका थिए ।

नेपाल रेडक्रस बैतडी शाखाका सभापति भीमदत्त पन्तको अध्यक्षतामा भएको कार्यक्रममा बैतडी क्षेत्र नं २ का सांसद नरबहादुर चन्दलगायतका विशिष्ट व्यक्तिहरु सहभागी हुनुहुन्थ्यो । रासस