नेपालको पुनर्निर्माण, आर्थिक एवम् सामाजिक विकास इयूको प्राथमिकता
काठमाडौँ, ८ मङ््सिर । युरोपेली सङ्घ (इयू)ले नेपालको पुनर्निर्माण, आर्थिक एवम् सामाजिक विकास आफ्नो पहिलो प्राथमिकता भएको स्पष्ट गर्दै त्यस निम्ति सक्दो सहयोग गर्ने प्रतिबद्धता व्यक्त गरेको छ ।
नेपाल¬–युरोपेली सङ¬्घ संयुक्त आयोगको नवौँ बैठकमा भाग लिने सिलसिलामा राजधानीमा रहनुभएका सङ्घका एसिया तथा प्रशान्त क्षेत्रका लागि युरोपेली बाह्य कार्य सेवा विभागका कायममुकायम प्रबन्ध निर्देशक उको आस्टुटोले त्यस्तो प्रतिबद्धता व्यक्त गर्नुभएको हो ।
बैठकपछि आज यहाँ आयोजित पत्रकार सम्मेलनमा उहाँले नेपालको विकासका लागि सङ्घले उल्लेख्य आर्थिक सहयोगको व्यवस्था गरेको बताउनुभयो । आगामी पाँच वर्षका लागि सङ्घले विकास सहयोगस्वरुप ३६ करोड युरो प्रदान गर्ने जानकारी दिँदै उहाँले यसअघि त्यति नै अवधिका निम्ति नेपाललाई ११ करोड ४० लाख युरो उपलब्ध गराइएको बताउनुभयो ।
शिक्षा, दिगो ग्रामीण विकास, लोकतन्त्र र विकेन्द्रीकरणका निम्ति सङ्घले सहायता राशीमा तेब्बरले वृद्धि गरेको जानकारी पनि उहाँले दिनुभयो । नेपालको व्यापार विस्तार एवम् लगानीका लागि पनि सङ्घले आवश्यक मद्दत गर्ने प्रतिबद्धता व्यक्त गर्दै उहाँले दीर्घकालीन आर्थिक विकास नै सङ्घको उद्देश्य भएको स्पष्ट गर्नुभयो ।
युरोपेली लगानी बैंकमार्फत त्यस्तो सहायता गर्ने सोच सङ्घको रहेको पनि उहाँले बताउनुभयो । नयाँ संविधान जारी हुनु नेपालका निम्ति ऐतिहासिक उपलब्धि भएको भन्दै उहाँले नेपाल–भारत सिमा नाकामा उत्पन्न असहज परिस्थितिको अन्त्यका निम्ति सम्बद्ध पक्षबीच वार्ता, संवाद र सहमति हुनुपर्नेमा जोड दिनुभयो । सहमतिको भावनाका साथ संवाद हुनुपर्ने आवश्यकता औँल्याउँदै उहाँले सबै पक्ष वार्तामा बस्नुपर्ने बताउनुभयो । यद्यपि उहाँले भारतको नाम उच्चारण गर्नुभएन । शीघ्र पुनर्निर्माण प्राधिकरण गठन भई भूकम्पपछिको पुनर्निर्माणका काम द्रुत गतिमा कार्यान्वयन हुने विश्वास पनि उहाँले व्यक्त गर्नुभयो । रासस