काठमाडौँ, ९ मङ्सिर । स्वास्थ्य मन्त्रालयले प्रथम चरणमा उपत्यकाका तीन अस्पताललार्ई आवश्यक औषधि वितरण गरेको छ ।

केन्द्रीय अस्पतालले बुझाएका आवश्यक औषधिको सूचीअनुसार औषधि वितरण गरिएको औषधि व्यवस्था विभागका महानिर्देशक तथा औषधि सहज बनाउन गठित कार्यदलका संयोजक बालकृष्ण खकुरेलले जानकारी दिनुभयो ।

उहाँले भन्नुभयो– “दातृ निकाय, नाकाबाट आएका औषधि तथा विभिन्न संस्थाबाट प्राप्त औषधि डा भगवान कोइराला संयोजक रहनु भएको समितिमार्फत वितरण गरिएको हो ।”

संयोजक खकुरेलले आज पनि सुनौली नाकाबाट औषधि भित्रिएको जानकारी दिनुभयो ।

औषधि वितरण गर्न बनाइएको समितिका संयोजक डा भगवान कोइरालाले आज पुलिस अस्पताल, मनमोहन मेमोरियल अस्पताललगायत तीन अस्पताललाई औषधि वितरण गरिएको जानकारी दिनुभयो ।

संयोजक डा कोइरालाले भन्नुभयो– “प्रथम चरणको औषधि वितरण गर्ने कार्य सुरु गरिसकेका छौँ, अब दुईचार दिनमा बाँकी औषधि आउने क्रम जारी छ अब औषधिको समस्या समाधान हुन्छ ।” अन्य अस्पतालको सूची आउने क्रम जारी रहेको र सूची आएपछि अन्य अस्पताललाई पनि औषधि वितरण गरिने उहाँको भनाई छ ।

तर, औषधिको आवश्यक भएको वीर अस्पतालले सूची बुझाइसकेको भए पनि औषधि नपाएको जनाएको छ । वीर अस्पतालका निर्देशक डा स्वयम्प्रकाश पण्डितले आफूहरुले आवश्यक औषधिको सूची बुझाइसकेको भए पनि औषधि प्राप्त नगरेको बताउनुभयो । “औषधिको लिस्ट बुझाएका छौँ, प्रक्रिया मिलाउदैँ छौँ भन्ने जवाफ आएको छ”– उहाँले भन्नुभयो ।

सिभिल अस्पतलालका निर्देशक डा विनयकुमार थापाले भने मन्त्रालयले दिने पहिलो चरणको औषधि आफूहरुसँग मौज्जात रहेकाले अरु नभएका अस्पताललाई दिन जवाफ दिएको बताउनुभयो । रासस