(शर्मिला पाठक)

काठमाडौँ । काठमाडौँको खुला मञ्चमा निर्माण हुन लागेको ‘बेसमेन्ट पार्किङ’सँगै जोडी भूमिगत मार्ग पनि निर्माण हुने भएको छ ।

यो देशकै ठूलो भूमिगत मार्ग हुनेछ । करिब एक महिनादेखि खुला मञ्चमा बेसमेन्ट पार्किङका लागि असम्भाव्यता अध्ययनको काम भइरहेको छ । सोही अध्ययनसँगै भूमिगत मार्ग निर्माणको अध्ययनको काम भइरहेको महानगरका सार्वजनिक–निजी साझेदारी कार्यक्रमका प्रमुख शिवराज अधिकारीले जानकारी दिनुभयो ।

खुला मञ्चदेखि नयाँ सडक, बागबजार तथा पुरानो बसपार्क छुने भूमिगत मार्ग निर्माण हुने छ । अधिकारीका अनुसार सर्वसाधारणले खुला मञ्चमा मोटर पार्किङ गरेर नयाँ सडक, बागबजार तथा बसपार्कसम्म जाने नागरिकलाई सहज होस् भन्ने उद्देश्यले सुरुङ मार्ग निर्माण गर्न लागिएको हो । पैदलयात्रीले पनि भूमिगत मार्ग प्रयोग गरेर ओहोरदोहोर गर्न सक्ने जनाइएको छ । काठमाडौँं उपत्यकाको पार्किङको समस्यालाई ध्यानमा राखी बेसमेन्ट पार्किङ बनाउन लागेको बताइएको छ ।
निर्माणपछि भूमिगत मार्ग दायाँबायाँको भाग भने व्यावसायिक प्रयोजनका लागि प्रयोग गर्न दिइने छ । बेसमेन्ट पार्किङको सम्भाव्यता अध्ययन भइरहेको छ । अबको एक महिनामा अध्ययनको परिणाम आउने छ । अध्ययनको जिम्मा नेस्ट प्रालिले लिएको छ । प्रतिवेदन प्राप्त भएपछि निर्माणका लागि बोलपत्र आह्वान गरिने बताइएको छ ।

अधिकारीका अनुसार ४८ रोपनी जग्गामा निर्माण गर्न लागिएको सो पार्किङस्थल दुई तलाको हुनेछ । अधिकारीका अनुसार सरकारले सहरी क्षेत्रमा पार्किङको व्यवस्थापन गर्ने नीति ल्याएसँगै बेसमेन्ट पार्किङ बनाउन लागिएको हो । खुलामञ्चमा पार्किङ स्थल बनेपछि बसपार्क, नयाँ सडक तथा जमलका सडकमा अव्यवस्थित सवारी पार्किङ गर्ने समस्या हट्ने विश्वास महानगरले लिएको छ । रासस