इन्द्रेणी तालको पुनःनिर्माण सुरु
दमक, ९ वैशाख । झापाको दमक–१९ मा रहेको इन्द्रेणीताल सिमसार क्षेत्रको संरक्षण तथा पुनःनिर्माणको काम पुनः थालिएको छ ।
केही समयअगाडिसम्म पनि पूर्वमा नै निकै चर्चा पाएको यस इन्द्रेणीताल सिमसार क्षेत्रको उचित संरक्षण तथा प्रवद्र्धन गर्न स्थानीयवासीले चासो देखाएका हुन् । यस वर्ष सिमसारको दिगो विकासका लागि पहिलो चरणमा पूर्वाधार विकासको काम सुरु गरिएको इन्द्रेणीताल सिमसार संरक्षण समितिका अध्यक्ष देवीप्रसाद दाहालले जानकारी दिनुभयो ।
समितिले पहिलो चरणमा दमक नगरपालिकाको रु पाँच लाख रुपैयाँको बजेटबाट ताल तथा सिमसार क्षेत्रको पूर्वाधार विकासका लागि ताल परिसरमा बाटो निर्माणको काम सुरु गरिएको अध्यक्ष दाहालले बताउनुभयो । उहाँले भन्नुभयो, “पूर्वको पर्यटन, प्रवद्र्धनका लागि यस सिमसारको विकासमा लागेका छौँ ।”
समितिको सक्रियतामा सिमसारको क्षेत्र निर्धारण तथा ताल वरिपरिको करिब तीन किलोमिटर बाटो निर्माणको काम सुरु गरिसकेको जनाइएको छ । करिब दुई बिघाभन्दा बढी क्षेत्रफलमा फैलिएको सो ताललाई दमक नगरकै गहनाका रुपमा विकास गर्ने उद्देश्यका साथ काम थालिएको समितिका सदस्य डिल्लीप्रसाद न्यौपानेले जानकारी दिनुभयो ।
उहाँले दोस्रो चरणमा विषयगत विशेषज्ञबाट गुरुयोजना बनाएर थप काम अघि बढाइने समेत बताउनुभयो । तालमा नौका विहार तथा माछापालन हँुदै आएको भएपनि पछिल्ला दिनमा यसको उचित संरक्षण हुन नसक्दा अलपत्र अवस्थामा पुगेको थियो । रासस