अन्तर्राष्ट्रिय बौद्ध गोष्ठीको तयारी पूरा
काठमाडौँ, ५ जेठ । २५६० औँ बुद्ध जयन्तीका अवसरमा बिहीबारदेखि सुरु हुने अन्तर्राष्ट्रिय बौद्ध गोष्ठीको तयारी पूरा भएको छ ।
सम्मेलन मूल आयोजक समारोह समितिले आज यहाँ पत्रकार सम्मेलनको आयोजना गरी सम्पूर्ण तयारी पूरा भएको जानकारी दिएको हो ।
अन्तर्राष्ट्रिय बौद्ध गोष्ठी काठमाडौँमा र बुद्ध जयन्ती समारोह लुम्बिनीमा हुनेछ । गोष्ठीको प्रधानमन्त्री केपी शर्मा ओलीले उद्घाटन गर्नुहुनेछ भने बुद्ध जयन्ती समारोहको लुम्बिनीमा ८ गते राष्ट्रपति विद्यादेवी भण्डारीबाट हुनेछ ।
गोष्ठीमा विभिन्न २८ देशका सरकारी प्रतिनिधि, प्रतिष्ठित धर्मगुरु, भिक्षु तथा भिक्षुणी र बौद्ध दर्शनका ज्ञाता तथा विद्वानको सहभागिता रहनेछ । गोष्ठीमा भाग लिने पाहुनाको आउनेक्रम जारी छ ।
‘लुम्बिनी, नेपाल ः भगवान् बुद्धको जन्मस्थान र बौद्ध दर्शनको उद्गम भूमि’ भन्ने मूल नाराका साथ मनाउन लागिएको गोष्ठीमा बौद्ध दर्शनसँग सम्बन्धित १८ विदेशी र छ नेपाली गरी २८ विद्वानले कार्यपत्र प्रस्तुत गर्नुहुनेछ ।
मूल गोष्ठीमा निस्किएको निष्कर्षको बुद्ध जयन्ती समारोह स्थल लुम्बिनीमा घोषणापत्र जारी गरिने छ जसमा अन्तर्राष्ट्रियस्तरको संयन्त्र निर्माणसहित कार्ययोजना रहने छ ।
संस्कृति, पर्यटन तथा नागरिक उड्डयनमन्त्री आनन्दप्रसाद पोखरेलले गोष्ठीले भगवान् बुद्धको जन्मथलो नेपाललाई विश्व शान्तिको केन्द्रका रुपमा स्थापित गरी नेपाललाई बौद्ध दर्शनको प्राज्ञिक केन्द्रका रुपमा विकास गर्न टेवा पुग्ने विश्वास व्यक्त गर्नुभयो ।
उहाँले गोष्ठीले लुम्बिनीका अतिरिक्त अन्य बौद्ध केन्द्र तिरौलाकोट, देवदह, रामग्रामको समेत प्रचारप्रसार र विकासका लागि आधार निर्माण गर्ने र आन्तरिक बुद्ध परिक्रमा पथ निर्माणमा मद्दत पु¥याउने विचार व्यक्त गर्नुभयो ।
यसैबीच, २५६०औँ बुद्ध जयन्तीका अवसरमा विश्वशान्तिको कामना गर्दै ‘शान्तिका लागि साइकल यात्रा’ अभियानले आज साइकल यात्रा सुरु गरेको छ ।
मन्त्री पोखरेलले सो साइकल यात्राको स्वयम्भूबाट साइकल चढेर यात्राको शुभारम्भ गर्नुभयो ।
विश्व साइकल यात्री पुष्कर शाहसहित करिब २६० साइकल यात्री स्वयम्भू परिक्रमा गरी लुम्बिनी प्रस्थान गरेको छ । विदेशबाट आउनुभएका अतिथिलाई पनि साइकल चढाएर प्रदूषणरहित लुम्बिनी बनाउने अभियानमा सहभागी गराइने भएको छ । रासस