संविधानपछि नेपाल राष्ट्रिय विकासको नयाँ आशा र विश्वासको युगमा प्रवेश गरेको छ–उपप्रम थापा
काठमाडौँ, १४ जेठ । उपप्रधानमन्त्री कमल थापाले दिगो विकासको कार्यसूची २०३० सँग मेल खानेगरी २०११–२०२० दशकका लागि कम विकसित राष्ट्रहरुको इस्तानबुल कार्ययोजनाको उच्चस्तरीय मध्यकालीन पुनरवलोकनको प्रभावकारी, पूर्ण र समयमै कार्यान्वयनमा जोड दिनुभएको छ ।
टर्कीको अन्तल्यामा आज भएको सत्रलाई सम्बोधन गर्दै परराष्ट्रमन्त्री थापाले यसका लागि राष्ट्रिय प्रयासहरु अन्तर्राष्ट्रिय सहयोगसँग परिपूरक हुनुपर्ने बताउनुभयो । उहाँले सो कार्ययोजनाको कार्यान्वयनका लागि नेपालले सबै प्रयास गरिरहेको र प्रगतिको सही मार्गमा गइरहेको बताउँदै नेपालमा गत वर्ष गएको भूकम्पले आठ अर्ब बढी क्षति भएकाले पुनःनिर्माणका लागि धेरै स्रोतसाधन, समय र बलियो साझेदारी आवश्यक भएको बताउनुभयो ।
नेपालले पुनःनिर्माणलाई गम्भीरतापूवर्क लिएको बताउँदै बलियो र दिगो अन्तर्राष्ट्रिय सहयोगबाट झनै राम्रो निर्माण हुनेमा विश्वस्त भएको बताउनुभयो ।
गत वर्षको भूकम्पपछि जारी भएको अधिकारयुक्त, प्रगतिशील र समावेशी संविधानपछि नेपाल राष्ट्रिय विकासको नयाँ आशा र विश्वासको युगमा प्रवेश गरेको उहाँले उल्लेख गर्नुभयो । “शान्ति प्रक्रियाको तार्किक निष्कर्ष र लामो राजनीतिक सङ्क्रमणपछि हाम्रो राष्ट्रिय कार्यभार विकास नै हुन पुगेको छ”–उहाँले भन्नुभयो । रासस