‘पर्वतारोहणसँगै सरसफाइलाई पनि ध्यान दिनु जरुरी’
काठमाडौँ, १६ जेठ । प्रधानमन्त्री केपी शर्मा ओलीले सरकारले आगामी आव २०७३÷७४ को बजेटले नेपालको विकासलाई तीव्रताका साथ अघि बढाउन नयाँ दृष्टिकोण पेस गरेको बताउनुभएको छ ।
नवौँ अन्तर्राष्ट्रिय सगरमाथा दिवसका अवसरमा मूल समारोह समितिले आज यहाँ आयोजना गरेको समारोहलाई सम्बोधन गर्दै प्रधानमन्त्री ओलीले बजेटले हरेक क्षेत्रलाई उत्साहित बनाएको र पर्यटन क्षेत्रलाई पनि प्रोत्साहन थपेको उल्लेख गर्नुभयो । “ आगामी आवको नीति तथा कार्यक्रम र बजेटले हरेक क्षेत्रलाई उत्साहित बनाएको छ । यसको अर्थ भनेको सरकार देश विकासका निम्ति दृढ सङ्कल्प र अत्यन्तै सुदृढ अठोटका साथ लागेको छ । पर्वतारोहण, पदयात्रा लगायतका पर्यटन देश विकासका निम्ति आवश्यक र अपरिहार्य हुन, यसप्रति सरकार गम्भीर छ,” उहाँले भन्नुभयो ।
प्रधानमन्त्री ओलीले सगरमाथा नेपालीको मान, प्रतिष्ठा र पहिचान हो भन्दै सगरमाथालाई स्वच्छ राख्नु चुनौतीपूर्ण बनिरहेको उल्लेख गर्नुभयो । उहाँले भन्नुभयो, “जलवायु परिवर्तनले विश्व तापमान वृद्धि हुँदा सगरमाथा लगायतका हिमालमा असर परेको छ, वातावरणीय सन्तुलन कायम गर्न सगरमाथाको प्रदूषण नियन्त्रण चुनौती बनेको छ । हामीले पर्वतारोहणसँगै सरसफाइलाई पनि ध्यान दिनु जरुरी छ ।”
कार्यक्रममा संस्कृति, पर्यटन तथा नागरिक उड्डयन राज्यमन्त्री बलबहादुर महतले नेपाल पर्वतारोहण, पदयात्रा तथा धार्मिक पर्यटनको प्रचुर सम्भावनालाई व्यावसायिक प्रवद्र्धन गर्न सरोकार भएका निकायबीच सहकार्य जरुरी भएको औँल्याउनुभयो । पर्यटन मन्त्रालयका सचिव प्रेमकुमार राईले नेपालको पर्यटकीय विशेषतालाई अन्तर्राष्ट्रियस्तरमा फैलाउन दिवस उपयोगी हुने बताउनुभयो ।
नेपाल पर्यटन बोर्डका प्रमुख कार्यकारी अधिकृत दीपकराज जोशीले सगरमाथा नेपालको मात्र नभई विश्वकै सांस्कृतिक सम्पदाको धरोहर भएकाले यसको संरक्षण प्रवद्र्धनका लागि साझेदारिताका साथ काम गरिनुपर्ने बताउनुभयो । नेपाल पर्वतारोहण सङ्घका अध्यक्ष आङ्छिरिङ शेर्पाले नेपालको पर्यटन सुरक्षित रहेको सन्देश विश्वमा फैलाउन दिवस सान्दर्भिक हुने बताउनुभयो । सगरमाथा आरोही पासाङतेन्जिङ शेर्पाले शेर्पा साथीहरुको कडा मिहेनतले वसन्त ऋतुको आरोहणको सफलता मिलेको छ भन्दै पर्वतारोहणलाई सुरक्षित र व्यवस्थित गर्न सरकारले विशेष ध्यान दिनुपर्ने बताउनुभयो ।
सो अवसरमा यस वर्षको वसन्त ऋतुमा सगरमाथाको पहिलो सफल आरोहण गर्ने पासाङ तेन्जिङ शेर्पा सहित नौ शेर्पा आरोहीलाई रु ५० हजारसहित सम्मान गरिएको थियो । सम्मानित हुने अन्य आरोहीमा आङ्पेम्बा शेर्पा, ग्लाल्जेनदोर्जे शेर्पा, पासाङदोर्जे शेर्पा, मिङ्मा शेर्पा, निमाछिरिङ शेर्पा, आङ्ग्याल्जेन शेर्पा, शेराग्याल्जेन शेर्पा र लाक्पाछिरिङ शेर्पा छन् ।
सोही अवसरमा सगरमाथाअङ्कित हुलाक टिकटमा प्रथम टाँचा लगाइयो । यसअघि बिहान मूल आयोजक समितिको आयोजनामा पर्यटनसँग सम्बन्धित विभिन्न सङ्घसंस्थाले सामूहिक रुपमा त्रिदेवी मार्ग ठमेलदेखि नेपाल पर्यटन बोर्डसम्म प्रभातफेरी गरेका थिए । रासस