प्रकाश मानवअधिकार पुरस्कार धर्मगुरु मन्जरीलाई
नेपालगन्ज, १६ साउन । अनौपचारिक क्षेत्र सेवा केन्द्र (इन्सेक) ले स्थापना गरेको ‘प्रकाश मानवअधिकार पुरस्कार’ यस वर्ष नेपालगन्जका मुस्लिम धर्मगुरु मौलाना अब्दुल जब्बार मन्जरीलाई प्रदान गरिएको छ ।
धार्मिक तथा जातीय सद्भावमा महत्वपूर्ण योगदान पु¥याएबापत मन्जरीलाई सो पुरस्कारबाट सम्मान गरिएको इन्सेकका क्षेत्रीय अध्यक्ष भोला महतले बताउनुभयो ।
यहाँ आज आयोजित समारोहमा राष्ट्रिय मानव अधिकार आयोगका अध्यक्ष अनुपराज शर्माले पुरस्कृत व्यक्तित्व मन्जरीलाई नगद रु ५० हजार र सम्मानपत्र प्रदान गर्नुभयो ।
पुरस्कृत व्यक्तित्व मन्जरीले आपूmले प्राप्त गरेको पुरस्कारको रकम नेपालगन्जस्थित मदरसा बरकातियाको शैक्षिक सुधारका लागि त्यसका प्रधानाध्यापक मौलाना जियाउल मुस्तफालाई हस्तान्तरण गर्नुभयो ।
त्यस अवसरमा आयोगका अध्यक्ष शर्माले मानवतावाद नै सबैभन्दा ठूलो धर्म भएको उल्लेख गर्दै मानवअधिकार पनि त्यसैको जगमा उभिएको हुन्छ भन्नुभयो । समारोहमा इन्सेकका अध्यक्ष सुबोधराज प्याकुरेल, महासचिव रमेशचन्द्र पौडेल, पत्रकार महासङ्घका केन्द्रीय सदस्य झलक गैरे र महिला नेत्री विजया धितालले पनि मन्तव्य व्यक्त गर्नुभएको थियो । रासस