नेवि संघमा भद्रगोल, बन्दसत्रनै हुन सकेन
काठमाडौँ, २५ साउन । नेपाल काँग्रेसको भ्रातृ संगठन नेपाल विद्यार्थी सङ्घको ११ आँै महाधिवेशनको बन्द सत्र अनिश्चित भएको छ ।
महाधिवेशन प्रतिनिधि विवादका कारण स्थगित भएको बन्दसत्र आज अपराह्न २ बजेका लागि निर्धारित गरिए पनि शुरु हुन सकेको छैन ।
संघको महाधिवेशन उद्घाटन यही साउन २३ गते भए पनि अझै बन्द सत्रको टुंगो नलाग्दा मुलुकभरबाट आएका हजारौँ विद्यार्थी नेता कार्यकर्ता निर्वाचनको विषयमा अन्योलग्रस्त बनेका छन् ।
आज दिनभरिमा प्रतिनिधि विवादको टुंगो लगाउने गरी काम भएको महाधिवेशन निर्देशक समितिका सदस्य किशोरसिंह राठौरले जानकारी दिए ।
प्रतिनिधि विवादका कारण आज बिहानदेखि गर्ने भनिएको कार्ड वितरण पनि प्रभावित भएको र प्रतिनिधिको विवाद नमिलेसम्म बन्द सत्र हुन नसक्ने नेवि संघ कार्यालयका मुख्य सचिव शिव रिमालले जानकारी दिए । रिमालले आज बन्द सत्र हुने सम्भावना न्यून रहेको बताए ।
समयमै बन्द सत्र हुनुपर्ने माग गर्दै अहिले महाधिवेशनस्थल भृकुटीमण्डपमा विद्यार्थीहरु नाराबाजी गरिरहेका छन् । यसअघि २०६४ सालमा चितवनमा भएको संघको १० औँ महाधिवेशन पनि प्रतिनिधि विवादका कारण लम्बिएर एक सातामा निर्वाचन भएको थियो ।
करिब तीन हजार चार सय महाधिवेशन प्रतिनिधि रहने भनिएको नेविसंमा विभिन्न ११ जिल्लाको प्रतिनिधिको अझै टुङ्गो लागेको छैन । रासस