बन्ने भयो रुपन्देहीमा फोहरमैला प्रशोधन केन्द्र
लुम्बिनी, १२ भदौ । सिद्धार्थनगर नगरपालिकाको टाउको दुखाइको विषय बनिरहेको फोहर मैला व्यवस्थापनको काम दीर्घकालीनरुपमै समाधान हुने भएको छ । त्यसका लागि भने नगरवासीले अबको डेढ वर्ष जति कुर्नुपर्नेछ ।
सिद्धार्थनगर नगरपालिकाले रु ३२ करोड लागतको रुपन्देहीको पड्खौली–८ गौरीघाटमा फोहर मैला प्रशोधन केन्द्र निर्माण गर्ने भएपछि फोहर मैला व्यवस्थापन गर्ने समस्याको समाधान हुने भएको हो । फोहरमैला प्रशोधन केन्द्र निर्माणका लागि नगरपालिकाले ठेक्का सम्झौता गरिसकेको छ । ठेक्का सम्झौता पछि निर्माणको प्रारम्भिक काम सुरु भइसकेको सिद्धार्थनगर नगरपालिकाले जनाएको छ ।
नगरपालिकाका प्रमुख एवम् कार्यकारी अधिकृत विष्णुदत्त गौतमका अनुसार प्रशोधन केन्द्र निर्माणका लागि गत वैशाखमा ठेक्का सम्झौता भएको हो । निर्माण गर्ने ठेक्काको जिम्मा भारतीय कम्पनी युपिएलइइएल र नेपाल आदर्श निर्माण सेवाले लिएका छन् ।
एसियाली विकास बैंकको सहयोगमा सिद्धार्थनगर नगरपालिकाभित्र सञ्चालित एकीकृत सहरी विकास आयोजना (आइयुडिपी) अन्तर्गत निर्माण हुन लागेको फोहरमैला प्रशोधन केन्द्र निर्माण हुन लागेको हो । आइयुडिपीले छुट्याएको ३२ करोड रुपैयाँमा पूर्वाधार निर्माण, पहुँचमार्ग निर्माण, दुई किलोमिटर सडक, डोजर, लोडर, टिपरलगायत आबश्यक उपकरण तथा २६ हजार डस्टबिनसहित एक वर्षको सञ्चालन खर्चसमेत जोडिएको प्रमुख गौतमले जानकारी दिनुभयो ।
सम्झौताअनुसार सर्भेको काम सुरु भइसकेको छ । आयोजना निर्माण गर्ने विषयमा स्थानीयवासीको केही गुनासो आएका कारण हामी छलफल र समन्वयलाई निरन्तरता दिँदै निर्माणको कामलाई पनि अगाडि बढाएका छौँ, नगरपालिकाका कार्यकारी अधिकृत गौतमले भन्नुभयो । प्रशोधन केन्द्र निर्माण भएर सञ्चालनमा आएपछि नगरपालिकाको मुहार नै फेरिनेछ । ठेक्का सम्झौताअनुसार वैशाखदेखि २० महिनाभित्र निर्माणको सम्पूर्ण काम सकिसक्नुपर्नेछ । २०७४ कात्तिकसम्ममा सञ्चालनमा आउने लक्ष्य लिइएको छ ।
नगरपालिकाबाट दैनिक २५ टन फोहर मैला उठ्ने गरेको छ । फोहरमैला प्रशोधन केन्द्र निर्माण भएपछि नगरपालिकालाई १५ वर्ष फोहरमैला व्यवस्थापनका लागि कुनै समस्या आउने छैन । प्रशोधन केन्द्र भएका कारण नगरवासीले वातावरणीय सुधार भएको महसुस गर्न पाउनेछन् भने फोहरबाट उत्पादित कम्पोस्ट मल र बिजुलीसमेत प्रयोग गर्न पाउने नगरपालिकाका वरिष्ठ इन्जिनियर तथा आइयुडिपी प्रमुख ई. शैलेन्द्रप्रसाद श्रेष्ठले जानकारी दिनुभयो ।
नगरपालिकाले नगरबाट फोहर उठाउने बेलामा कुहिने र नकुहिने दुवै प्रकृतिको फोहर छुट्याएर मात्रै लैजान्छ, ई. श्रेष्ठले भन्नुभयो, “कुहिने मलबाट कम्पोस्ट मल तयार गर्ने उक्त कम्पोस्ट मललाई नजिकैका गाउँलेलाई सहुलियत दरमा बिक्री गर्ने तथा त्यसपछि पनि बचे बाहिरका मानिसलाई चलनचल्तीको दरमा बिक्री गर्ने सोच रहेको छ ।”
त्यसैगरी, फोहरबाट बिजुली निकाल्नका लागि वैकल्पिक ऊर्जा प्रबद्र्धन केन्द्रसँग सम्झौता भइसकेको उहाँले बताउनुभयो । त्यसअन्तर्गत बिजुली उत्पादन गर्नका लागि सम्भाव्यता अध्ययनको काम सुरु भइसकेको नगरपालिकाले जनाएको छ । रासस