पहिलो महिला सगरमाथा आरोही जुनको तावेईको मृत्यु
काठमाडौं, ६ कात्तिक । लामो समयदेखि क्यान्सर राेगबाट पीडित पहिलो महिला सगरमाथा आरोही जुनको तावेईको निधन भएको छ । उनले सन् १९७५ मे १६ मा २० दिन लगाएर सर्वौच्च शिखर सगरमाथामा पाइलमा टेक्न सफल भएकी थिइन् ।
साइतामा राज्यको क्यान्सर अस्पतालमा उपचार गर्दै गर्दा मृत्यु भएको जापानी सञ्चार माध्यमले जनाएको छ । सोवा उमन्स विश्वविद्यालयबाट अंग्रेजी विषयमा उच्च शिक्षा हासिल गरेकी तावेको दुई सन्तान रहेका छन् । उनलाई तत्कालिन राजा विरेन्द्रले गोर्खा दक्षिण वाहु पदकले सम्मान समेत गरेका थिए । ७७ वर्षिय तावेईको जापानमा निधन भएको छ ।
तावेईको तीन दिनअघि निधन भएको खबर जापानी माउन्टेनरिङ एसोसिएसन र अल्पाइन क्लबले जानकारी गराएको नेपाल पर्वतारोहण सङ्घ (एनएमए)का अध्यक्ष आङ्छिरिङ शेर्पाले जानकारी दिए । नेपाल र नेपालीलाई धेरै माया गर्ने, पर्वतीय पर्यटनमा महत्वपूर्ण भूमिका खेलेकी तावेईको निधनले नेपालको पर्वतीय पर्यटनमा ठूलो क्षति पुगेको उनले बताए ।
त्यसैगरी, जुनको तावेई गत अप्रिल ३० मा काठमाडौँमा भएको मनास्लु र ल्होत्से हिमालको हीरक महोत्सवमा सहभागी हुन जापानी आरोहीको नेतृत्व गर्दै नेपाल आएकी थिइन् ।