आर्थिक क्षेत्रलाई समृद्ध बनाउन पर्यटन क्षेत्रको विकास आवश्यक : मन्त्री भण्डारी
काठमाडौँ, १ पुस । वन तथा भू–संरक्षणमन्त्री शङ्कर भण्डारीले मुलुकलाई आर्थिक क्षेत्रमा समृद्ध बनाउन पर्यटन क्षेत्रको विकास आवश्यक रहेको बताउनुभएको छ ।
प्वाइन्ट मिडियाद्वारा प्रकाशन हुने ‘अर्थ र व्यापार’ साप्ताहिकको पाँचौँ वार्षिकोत्सव तथा अर्थ र व्यापार पत्रकारिता अवार्ड वितरण कार्यक्रममा आज आयोजित कार्यक्रममा प्राकृतिक स्रोत साधनले भरिपूर्ण नेपालमा पर्यटन क्षेत्रको ठूलो सम्भावना रहेको बताउनुभयो ।
“अन्य मुलुकको पर्यटनको पूर्वाधारलाई हेरेर नेपालको पर्यटन क्षेत्रको विकासमा लाग्नुपर्छ,” उहाँले भन्नुभयो । लामो समयपछि जनताका प्रतिनिधिले बनाएको संविधान पाएकाले संविधानलाई कार्यान्वयन गरी मुलुकलाई विकासको बाटोमा अगाडि लैजानुपर्र्नेमा उहाँले जोड दिनुभयो । मुलुकको पर्यटन क्षेत्रको विकासका लागि सबै क्षेत्र जिम्मेवार हुनुपर्ने मन्त्री भण्डारीको भनाइ थियो ।
नेपाल पर्यटन बोर्ड सञ्चालक समितिका सदस्य राजेन्द्र सापकोटाले प्राकृतिक र पर्यटकीय क्षेत्रले सुन्दर मुलुक भएकाले यसलाई प्रयोग गरी मुलुकलाई पर्यटकीय क्षेत्रका रुपमा विकास गर्नुपर्ने बताउनुभयो ।
नेपाल पर्वतारोहण सङ्घका अध्यक्ष आङ्छिरिङ शेर्पाले एक मुठ्ठी माटो खर्च नगरी आर्थिक लाभ हुने क्षेत्र पर्यटन नै भएकाले यसको विकास र विस्तारका लागि राज्य गम्भीर हुनुपर्ने बताउनुभयो । नेपाल टुर्स एण्ड ट्राभल्स एजेन्सिज् एसोसिएसन (नाटा)का पूर्व अध्यक्ष रामकाजी कोनेले नेपालमा पर्यटनको प्रचुर सम्भावना भएकाले पूर्वाधारको विकास जरुरी रहेको बताउनुभयो ।
अर्थ र व्यापार साप्ताहिकका प्रधानसम्पादक नवीन काफ्ले, ट्रेकिङ एजेन्सिज् एसोसिएसन अफ नेपाल (टान)का पूर्व अध्यक्ष दीपक महत, पर्यटन व्यवसायी राजन सिम्खडालगायतले युवालाई पर्यटन क्षेत्रको विकासमा संलग्न गराउनुपर्नेमा जोड दिनुभयो ।
उक्त अवसरमा पत्रकारिताको माध्यमबाट पर्यटन क्षेत्रको विकासमा योगदान पु¥याएबापत राजधानी दैनिकका वरिष्ठ समाचारदाता मधुजङ्ग पाण्डेलाई रु १० हजारसहित अर्थ र व्यापार पत्रकारिता अवार्ड प्रदान गरिएको थियो । यस्तै पर्यटन क्षेत्रमा विशेष योगदान पु¥याएका राजन सिम्खडा, छेटुप तामाङ, साङ्गे लामा, अर्जुन शर्मा पौडेल, शङ्कर अधिकारी, सुरेन्द्र भट्टराई, सुवासचन्द्र बनेपाली, सञ्जय पराजुली, राजेशचन्द्र रेग्मी, गगनकुमार श्रेष्ठ र भूपेन्द्र जिसीलाई सम्मान गरिएको थियो । रासस