सरकार र चिकित्सक संघबीच चार बुँदे सहमति, ८ दिनपछि अस्पताल खुले
काठमाडौं / असोज १३ गते । मुलुकभर आकस्मिक बाहेकका स्वास्थ्य सेवा ठप्प पार्दै आन्दोलनमा रहेका नेपाल चिकित्सक संघ र सरकारबीच चार बुँदे सहमति भएको छ । संयुक्त राष्ट्रको महासभामा सहभागी भएर प्रधानमन्त्री शेरबहादुर देउवा स्वदेश फर्किएको भोली पल्ट आजै बालुवाटारमा भएको वार्तामा स्वास्थ्य मन्त्रालय र संघबीच चार बुँदे सम्झौता भएको हो । यसअघि भएका पटकपटकका वार्तामा स्वास्थ्य मन्त्रालयले प्रधानमन्त्री देउवाको स्वदेश फिर्तालाई सहमतिको बटमलाईन बनाउदै आएको थियो भने चिकित्सक संघले लिखित प्रतिबद्धता माग्दै आएको थियो ।
प्रधानमन्त्री देउवाको उपस्थितिमा भएको वार्तामा सरकारले संघको माग अनुसार स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन संशोधन गर्ने प्रतिवद्धता जनाएको संघका अध्यक्ष डा. मुक्तिराम श्रेष्ठले बताउनुभयो । सरकार र संघबीच सहमति भएसँगै चिकित्सक संघले आठ दिन लामो आन्दोलनका सम्पूर्ण कार्यक्रम फिर्ता लिई आजैबाट काममा फर्कने प्रतिबद्धता जनाएको छ ।
संघको आन्दोलनका कारण गत असोज ६ गतेदेखि मुलुकभरका स्वास्थ्य संस्थामा आकस्मिक बाहेकका सेवा सञ्चालन हुन सकेका थिएनन् । सम्झौता पक्षमा मन्त्रालयका सचिव डा. किरण रेग्मी र संघका अध्यक्ष श्रेष्ठले हस्ताक्षर गर्नु भएको छ । चिकित्सक तथा अस्पतालविरुद्ध आक्रमण तथा दुव्र्यबहार गर्ने माथि कारबाही गर्ने गरी ऐन संशोधन गर्न सरकारले सहमति जनाएको संघद्धारा जारी विज्ञप्तिमा उल्लेछ छ । त्यसका लागि स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन २०६६ र सो सम्बन्धमा बनेको नियमावली २०६९ लाई परिमार्जन गरिने सहमति दुई पक्षबीच भएको छ । सम्झौता कार्यान्वयनका लागि संघको सहभागितामा तीन दिन भित्र समिति गठन गरी प्रक्रिया अघि बढाइने संघले जनाएको छ । यसअघि संघ र मन्त्रालयबीच पटक–पटक भएको वार्तामा सहमति नहुँदा दशैको मुखैमा बिरामीले सास्ती बेहोर्नु परेको थियो ।