राष्ट्रियसभा निर्वाचनः सोमबार उम्मेदवारलाई चुनाव चिन्ह प्रदान गरिने; स्याङजाका रामबहादुर थापाको उम्मेदवारी रद्द
काठमाडौं । माघ २४ गते हुने भनिएको राष्ट्रियसभा सदस्य निर्वाचनमा भाग लिएका उम्मेदवारलाई आगामी सोमबार चुनाव चिन्ह प्रदान गर्ने तयारी भएको निर्वाचन आयोगले जनाएको छ ।
निर्वाचन आयोगले सोमबार उम्मेदवारको अन्तिम नामावली प्रकाशन गर्ने र सोही दिन उम्मेदवारहरूलाई निर्वाचन चिह्न प्रदान गर्ने तयारी गरेको गरेको हो । राष्ट्रियसभा सदस्य निर्वाचनका उम्मेदवारलाई नाम फिर्ता लिन चाहेमा आइतवार दिउँसो २ बजेसम्मको समय दिइएको आयोगका प्रवक्ता नवराज ढकालले जानकारी दिए । राष्ट्रियसभा सदस्य निर्वाचनमा गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख एक हजार ५०६ तथा ५५० प्रदेशसभा सदस्य मतदाता रहेका छन् ।
निर्वाचनकालागि नौ राजनीतिक दलबाट समूहगत रूपमा महिला २६, अन्य समूहका २८, दलित १४ र अपाङ्गता भएका व्यक्ति वा अल्पसङ्ख्यक समुदायबाट १५ उम्मेदवारी दर्ता गरेका छन् ।
स्याङजाका रामबहादुर थापाको उम्मेदवारी रद्द
राष्ट्रियसभा सदस्य निर्वाचनका लागि प्रदेश नं ४ बाट मनोनयन दर्ता गराएका स्याङजाका रामबहादुर थापाको उम्मेदवारी निर्वाचन आयोगले रद्द गरेको छ । अपाङता भएका व्यक्तिको कोटामा एमालेबाट उम्मेदवारी दिएका थापाले परिचयपत्र नविकरण नगरेको खुलेपछि उम्मेदवारी रद्द गरिएको निर्वाचन आयोगका प्रवक्ता नवराज ढकालले जानकारी दिनुभयो ।
कांग्रेसका तर्फबाट राष्ट्रिय सभा सदस्यका उम्मेदवार तनहुँका प्रकाश पन्थले थापाविरुद्ध मूख्य निर्वाचन अधिकृतको कार्यालय कास्कीको पोखरामा उजुरी दिएका थिए । अपांगता परिचय पत्र पुरानो भएकाले मान्यता दिन नहुने भन्दै पन्थले थापाको उम्मेदवारी बदरको माग गरेका थिए । उजुरी परेपछि थापाले सोही परिचयपत्रका आधारमा अहिलेसम्म राज्यका निकायबाट पाईने सुविधा लिएको, नयाँ निर्देशिका अनुसार नयाँ कार्डका लागि प्रक्रियामा रहेकाले ढिलाई भएको भन्दै सफाई पाउनुपर्ने दलीलसहित कागजात पेश गरेका थिए ।
राष्ट्रिय सभा निर्वाचन कार्यक्रम अनुसार भोलि बिहान १० बजे देखि १ बजे सम्म मनोनयन दर्ता गराएका उम्मेदवारको सूची सार्वजनिक गरिनेछ । त्यस्तै भोलि १ देखि पर्सि २ बजे सम्म उम्मेदवारलाई उम्मेदवारी फिर्ताका लागि समय दिइने आयोगको कार्यतालिका छ । पर्सि ३ देखि ४ बजे उम्मेदवारको अन्तिम सूची सार्वजनिक गरी अपराह्न ४ देखि ५ बजेसम्म निर्वाचन चिन्ह प्रदान गरिने प्रवक्ता ढकालले बताउनुभयो । राष्ट्रिय सभा निर्वाचन आगामी २४ गते बिहान १० देखि दिउँसो ३ बजेसम्म हुनेछ ।