राजनीतिसँगै भैँसीपालन

स्याङ्जा, चैत १३ गते । युवा अवस्था लडाइँमा खर्चनु भएका वालिङ नगरपालिका–९ का ताराप्रसाद भुसालले भँैसीपालनबाट मनग्य आम्दानी गर्न थाल्नुभएको छ । दुई वर्षदेखि वालिङ नगरपालिका–१ त्रियासीमा सञ्चालन गरेको भैँसी फार्मबाट मनग्य आम्दानी गर्नुभएको हो ।

२०४७ सालदेखि राजनीतिमा होमिनुभएका भुसालको राजनीतिसँगै गोबर फाल्ने, दाना खुवाउने, दूध दुहुने र दूध वितरण गर्ने दैनिकी बनेको हो । उहाँ अहिले नेकपा माओवादी केन्द्रको पोलिटब्युरो सदस्य हुनुहुन्छ ।

पार्टी शान्ति प्रक्रियामा आएपछि राजनीतिका साथै भैँसीपालन व्यवसाय राजेको भुसालले बताउनुभयो । दुई छोरीका पिता भुसालले बालबच्चाको भविष्यका लागि राजनीतिसँगै भैँसीपालन रोज्नु परेको बताउनुभयो ।

०६८ सालमा घरनजिक रहेको बारीमा किबी खेती सुरु गर्नुभएका भुषालले किबी उपयुक्त नपाएपछि एक लाख खर्चलाई थाती राखेर विकल्पमा भैँसी पालन रोजेको बताउनुभयो । वार्षिक ७० हजार रुपियाँमा १० रोपनी जग्गा भाडामा लिएर भैँसीपालन थालेको बताउँदै भुसालले यसबाट आफूलाई सन्तोष मिलेको बताउनुभयो।buffalo

उहाँले ३० लाखको लगानीमा भैँसी गोठ र १५ भैँसी किन्नु भएको छ । यसमा आफू, श्रीमती र अरू युवाले समेत रोजगारी पाएको उहाँले बताउनुभयो ।

द्वन्द्वको समयमा जनताको घरमा गोबर फाल्ने, दूध दुहुने, दूध बेच्ने, दाना खुवाउने काम गरेको बताउँदै भन्नुभयो, अहिले पनि सोही काम गरेको छु । उहाँले भैँसीपालनबाट दैनिक साँझ र बिहान गरेर एक सय लिटर दूध स्थानीयलाई बेच्ने गरेको बताउनुभयो ।

भैँसीको दूध प्रतिलिटर एक सय रुपियाँमा बेच्ने गरेको बताउँदै भुषालले भन्नुभयो, दूध गोठबाटै खोसाखोस हुन्छ । बजारको समस्या नरहेको भन्दै उहाँले घरनजिक गोठबाटै भैँसीको शुद्ध दूध पाउने भएपछि स्थानीयलाई पुराउन धौ–धौ भएको बताउनुभयो ।

भुसालले भाडामा लिएको जग्गामा दुई रोपनीमा भैँसी गोठ बनाउनुभएको छ भने एक रोपनीमा पराल र गोबर राख्नुका साथै अन्य छ रोपनीमा घाँस र तरकारी लगाउनुभएको छ । उहाँले परालको खर्च गोबरको बिक्रीले पुग्ने बताउँदै भैँसीका लागि दैनिक दुई हजार रुपियाँ बराबरको दाना किन्नुपर्ने बताउनुभयो ।

भैँसीको दूध बिक्रीबाट मासिक तीन लाख रुपियाँ आम्दानी हुने बताउँदै भुसालले कर्मचारी, दाना, औषधि उपचार, जग्गाको भाडा र किस्ता तिरेर मासिक एक लाख बचत गरेको बताउनुभयो ।

पहाडको दुर्गम बस्तीमा पशुपालनको लागि पराल र दाना ढुवानीमा समस्या रहेको बताउँदै उहाँले भन्नुभयो, पशुपालन व्यवस्थित गर्न दाना तथा पराल ढुवानीको राज्यले व्यवस्था गर्नु पर्दछ । उहाँले राज्यले सुपथ ब्याज दरमा ऋण र प्रोत्साहनस्वरूप सहयोग हुन सकेमा पशुपालनमा नागरिकको आकर्षण बढ्ने र देशमा आर्थिक विकास हुने बताउनुभयो ।