संघीय संसदमा राष्ट्रपतिको सम्बोधन, अब नेपालमा असाधारण सम्भावनाको ढोका खुल्यो
काठमाडौं– राष्ट्रपति विद्यादेवी भण्डारीले संघीय संसदलाई सम्बोधन गर्दै समुन्नत समाज निर्माणमा एक भएर अघि बढ्न आह्वान गरेकी छन् ।
राष्ट्रपति भण्डारीले संसद भवन नयाँवानेश्वर पुगेर प्रतिनिधि सभा र राष्ट्रिय सभालाई संयुक्त रुपमा सम्बोधन गर्दै अबको नेपाल मनोमालिन्य र कुनैपनि किसिमको शोषण र दमनबाट मुक्त हुनुपर्ने पनि बताइन् ।
उनले यस वर्ष सम्मपन्न विभिन्न तहका निर्वाचनबाट जनताले आफूले बनाएको संविधानलाई बलशाली भएको बताइन् ।
त्यस्तै उनले आम जनताले निर्वाचनमा जनाएको सहभागिता र उत्साहले सम्मृद्ध नेपाल बनाउने अभिभारा थपिदिएको भन्दै नेपालमा असाधारण सम्भावनाको ढोका खुलेको बताइन् । ‘विकासको फलमा सवैको समान पहुँच, श्रोत साधनको सदुपयोग गर्दै एकताबद्ध भएर अघि बढौं’, राष्ट्रपतिले सम्बोधनका क्रममा भनिन् ।
मित्र राष्ट्रसँग सहकार्य गर्दे अघि बढ्न आह्वान गर्दै शहीदको सपना साकार पार्ने समय आएकाले समुन्नत समाज निर्माणमा एक भएर अघि बढ्न आव्हान गरेकी छन् ।
राष्ट्रपति भण्डारी संघीय संसद भवन पस्दै गर्दा प्रधानमन्त्री केपी शर्मा ओली, सभामुख कृष्ण बहादुर महरा, राष्ट्रियसभाका अध्यक्ष गणेश तिमल्सिना, सरकारका मन्त्रीहरु लगायत विशिष्ठ व्यक्तिले स्वागत गरेका थिए ।
राष्ट्रपतिका स्वागतका लागि संसंद भवनलाई सिंगारेर दुलही जस्तो बनाईएको थियो । संसद प्रवेश द्धारमा रातो कार्पेट विछ्याउनुको साथै पुर्वी भागमा पानीको फोहरा तथा रंगीचंगी फुलका गमला ले सजिसजाउ पारिएको थियो । राष्ट्रपतिको सम्मानमा नेपाली सेनाको टुकडीले सलामी दिएको थियो ।
राष्टपतिको सम्बोधनमा संबैधानिक निकायका प्रमुख, सरकारका सचिव, कूटनीतिक नियोगका प्रमुख लगायतको उपस्थिति थियो ।
संविधानको धारा ९५ को दफा २ मा राष्ट्रपतिले प्रतिनिधिसभाको निर्वाचनपछिको पहिलो अधिवेशन र प्रत्येक बर्षको पहिलो अधिवेशन प्रारम्भ भएपछि संघीय संसदको दुवै सदनको संयुक्त बैठकलाई सम्बोधन गर्ने व्यवस्था छ ।
त्यसैगरी सोही धाराको दफा १ मा संघीय संसदको कुनै सदनको बैठक वा दुवै सदनको संयुक्त बैठकलाई सम्बोधन गर्न र त्यसका लागि सदस्यको उपस्थिति आह्वान गर्न सक्ने व्यवस्था छ । प्रतिनिधिसभामा २ सय ७५ र राष्ट्रियसभामा ५९ सदस्य छन् ।