नेकपाको चियापान सम्पन्न, प्रधानमन्त्री ओली अस्वस्थताका कारण उपस्थित हुन सकेनन्
काठमाडौँ, कात्तिक १० गते । सत्तारुढ दल नेपाल कम्युनिष्ट पार्टी नेकपाले विजयादशमी, दिपावली तथा छठ पर्वको अवसर पारेर आज शुभकामना आदान–प्रदान तथा चियापान कार्यक्रम गरेको छ । राजधानीको भृकुटीमण्डपमा आयोजना गरेको कार्यक्रममा विभिन्न दलका नेता, उच्च पदस्थ व्यक्ति र विभिन्न कुटनीतिक नियोगका प्रमुखको उपस्थिति थियो । मध्यान्ह १२ बजेदेखि ३ बजेसम्म नेता, कार्यकर्ता र सर्वसाधारणका लागि समय छुट्टयाएको नेकपाले ३ देखि ५ बजेसम्म उच्च पदस्थ व्यक्तिका लागि समय छुट्टयाएको थियो ।
कार्यक्रममा पार्टी अध्यक्ष अध्यक्ष पुष्पकमल दाहालसहित पार्टीका शीर्ष नेताहरु सहभागी हुनुहुभएको थियो । चियापान कार्यक्रममा भारतीय कम्युनिष्ट पार्टी माक्र्सबादीका महासचिव सिताराम यचुरी पनि सहभागी हुनुहुन्थ्यो । प्रधानमन्त्री समेत रहेका अर्का अध्यक्ष केपी शर्मा ओली भने स्वास्थ्यमा समस्य भएका कारण उपस्थित हुनुभएन । रुघा खोकीका कारण छातीमा समस्या भएकाले कार्यक्रममा उपस्थित हुन नसक्नुभएको ओलीको सचिवालयले जनाएको छ । पार्टी महासचिव विष्णु पौडेलले चियापान कार्यक्रम शुभकामना आदान प्रदानमा केन्द्रीत भएकाले राजनीतिक रुपमा लिन नहुने बताउनुभयो ।
प्रमुख प्रतिपक्ष नेपाली कांग्रेसले पनि मुलुकलाई एकतावद्ध बनाउने जिम्मेवारी सत्तारुढ दल कै भएको जनाएको छ । चियापान कार्यक्रममा सहभागी कांग्रेस सभापति शेर बहादुर देउवाले मुलुकलाई एक ढिक्का बनाउने जिम्मेवारी सत्तारुढ दलको भएको प्रतिक्रिया दिनुभएको हो । कांग्रेसले पनि आगामी शुक्रबार चियापान कार्यक्रम गर्दैछ ।