ज्येष्ठ नागरिक र एकल महिला सम्मानित
ललितपुर, चैत २८ गते । गोदावरी, बडिखेलकी ९० वर्षीया टीकादेवी घिमिरे पहिलो पटक सार्वजनिक स्थानमा सम्मानित हुन पाउँदा खुशी देखिनुहुन्थ्यो । उहाँले पहिले त अरुको सामुन्ने आफूलाई मात्र किन मञ्चमा आसन ग्रहण गराएको होला भनेर पत्तोसमेत पाउनुभएन ।
आफूलाई लगाइदिएको माला र दोसल्ला नियाल्दै उहाँ जीवनमा पहिलो पटक यस्तो क्षण मिलेको भन्दै मख्ख देखिनुहुन्थ्यो । गोदावरी नगरपालिका ४ नं वडा कार्यालयले वडामा रहेका ७० वर्षमाथिका नागरिक र हरेक उमेर समूहका एकल महिलालाई सम्मान कार्यक्रम आयोजना गरेको थियो । उक्त अवसरमा सहभागी घिमिरेजस्तै विभिन्न उमेर समूहका कूल ११४ ज्येष्ठ नागरिक र ७९ एकल महिलासमेत खुशी देखिन्थे ।
माला, दोसल्ला, मिठाइ र फलफूलबाट सम्मानित उहाँहरु वडा कार्यालयले पहिलो पटक गरेको कार्यक्रममा एकापसमा खुशी साटासाट गर्दै हुनुहुन्थ्यो । सतहत्तर वर्षीया सावित्री आचार्यले पहिलो पटक समाजमा अरुको सामुन्ने सम्मानित हुन पाएको भन्दै खुशी व्यक्त गर्नुभयो । “बूढेसकालमा वडाले नसोचेको काम ग¥यो”, उहाँले भन्नुभयो, “हामी डाँडामाथिको जूनले यस्तो अवसर पाउँछौँ भन्ने कहिले सोचेका थिएनौँ ।”
उहाँहरुलाई छोरानाति र छोरीबुहारीले हँसीमजाक गर्दै कसैलाई सवारी साधन त कसैलाई डोहो¥याएर र कतिलाई साथी लागेर सम्मानस्थलसम्म ल्याइदिनु भएको थियो ।
प्रदेशसभा सदस्य लालकुमारी पुनले एकल महिलाको सहयोगमा वडा कार्यालयले सधैँ तत्पर रहनुपर्नेमा जोड दिनुभयो । “ज्येष्ठ नागरिक समाजका इतिहास हुन्”, पुनले भन्नुभयो, “यी व्यक्ति ज्ञान, सीप र अनुभवका भण्डार हुनाका साथै घर, परिवार, समाज, राष्ट्रका पथप्रदर्शक र प्रतिष्ठा पनि हुन् । ”
गोदावरी–४ का वडाध्यक्ष मुकुन्दबहादुर पहरीले वर्षैपिच्छे बडिखेलका ज्येष्ठ नागरिक र एकल महिलालाई सम्मान गरेर उहाँहरुको जीवनमा ऊर्जा थप्ने काम गर्ने प्रतिबद्धता व्यक्त गर्नुभयो । ज्येष्ठ नागरिक सम्मान कार्यक्रमका अध्यक्ष प्रतिमा घिमिरेले ज्येष्ठ नागरिक र एकल महिला भार नभई समाजका शृङ्गार भएको बताउनुभयो । रासस