विदेश छोडेर फूल खेतीमा रमाउँदै युवा

अमरराज नहकी / तनहुँ, कात्तिक ८ गते । वैदेशिक रोजगारी छोडेर तनहुँको शुक्लागण्डकी नगरपालिका–८ डहरेका ६ जना युवा मिलेर पूmल खेती गरेका छन् । उनीहरुको फूलको माग बढेकाले उनीहरु खुसी भएका छन् । सरकारले स्वदेशी उत्पादनलाई प्रोत्साहन गर्दै भारतीय फूल निरुत्साहित गर्न थालेकाले फूल विक्री गर्न सहज भएको उनीहरुको भनाइ छ ।

फूल खेती गर्ने युवामा सूर्यकुमार श्रेष्ठ, केशवराज श्रेष्ठ, महेन्द्र श्रेष्ठ, भरतसिंह ठकुरी, उज्ज्वल श्रेष्ठ, राजु श्रेष्ठ, हेमबहादुर सिंह ठकुरीले गाउँकै ६ रोपनी जग्गा भाडामा लिएर फूल खेती गर्नु भएको हो । कुनै समय करेसा र आँगनको शोभाका रुपमा लगाइने फूल अहिले व्यवसायिक रुपमा लगाउन थालिएको हो ।

भारतीय फूलले नेपाली रकम विदेशिएको र श्रम र सीप स्वदेशीमा नै प्रयोग गर्नुपर्छ भन्ने लागेर फूल खेती शुरुवात गरिएको सूर्यकुमार श्रेष्ठले जानकारी दिनुभयो । विभिन्न कार्यक्रम र उत्सवमा फूलको मालाको प्रयोग बढ्न थालेपछि व्यवसायिक रुपमा फूल खेती फुलको अत्याधिक खपत हुने पर्व तिहार नजिकिएसँगै उनीहरुमा उत्साह थपिएको छ ।

दुबईमा ६ वर्ष विताएपछि नयाँ काम गर्ने सीपको प्रयोग गरियो भने स्वदेशमै त्यो भन्दा धेरै कमाई गर्न सकिन्छ भन्ने लागेर शुरुवात गरिएको श्रेष्ठ बताउनुहुन्छ । वडाले ४ दिनसम्म दिएको फूल खेतीको तालिम लिएपछि थप हौसला मिलेर काम गर्न सुरु गरेको उहाँ बताउनुहुन्छ । विदेशमा पैसा त हुन्छ तर अर्काको इसारामा काम गर्नुपर्छ केशव श्रेष्ठले भन्नुहुन्छ – ‘दक्षिण कोरियामा ५ वर्ष बसेको जानकारी दिँदै विदेशको दुःख सम्झेर स्वदेशमै केही गर्नुपर्छ भनेर फूल खेती सुरु गरेको बताउनुभयो ।

कोरियाको ठाउँ निकै मेहनत गर्नु पर्ने यतिको गरे आफ्नै ठाँउमा पनि राम्रो व्यवसाय गर्न सकिन्छ भनेर कोरियाको थप ५ वर्षको भिसा क्यान्सिल गरेर साथीहरुसँग काम सुरु गरेको उहाँले बताउनुभयो । श्रेष्ठले युवा बेरोजगार भएर बस्नुभन्दा नेपालमा नै केही गरे आत्मनिर्भर बन्न सकिन्छ भन्ने उदाहरण दिन यो पेसा सुरु गरेको जानकारी दिनुभयो ।

मिलेर काम गरौं भनेर एक लाख लगानीमा फूलको व्यवसायिक खेती गरेको उनीहरुको भनाइ छ । मुनाफा भएको रकमले अझंै धेरै जग्गा भाडामा लिएर व्यवसायलाई अगाडि बढाउने सोच उनीहरुको छ ।

सुरुमा चितवनबाट ६० हजार रुपैयाँमा ५ हजार तिहारे फूलको विरुवा ल्याएर उनीहरुले पेसा सुरु गरेका हुन् । एकवटा विरुवाको झण्डै ३० रुपैयाँ पर्न जाने हुँदा आगामी वर्षमा विरुवा समेत उत्पादन गरेर सस्तोमा विक्री वितरण गर्ने योजना रहेको समेत उनीहरुको भनाइ छ । फूल विक्री गरेर लगानी उठिसकेको र अब दोब्बर मुनाफा हुने अपेक्षा गरिएको छ । अनुभव लिन थोरै रोपनी जग्गामा खेती गरिएको माग राम्रो भएकाले विस्तार गर्ने सोचाई आएको हेमबहादुरसिंह ठकुरी बताउनुहुन्छ ।