ऋण असुली न्यायाधीकरणमा नरेशराज अर्याल पुनः नियुक्त
काठमाडौं, पुस १७ गते । मन्त्रिपरिषदको बैठकले ऋण असुली न्यायाधीकरणको रिक्त बैंकिङ सदस्य पदमा नरेशराज अर्याललाई आगामी पाँच वर्षको लागि पुनः नियुक्ति गर्ने निर्णय गरेको छ ।
सञ्चार तथा सूचनाप्रविधि मन्त्री गोकुलप्रसाद बाँस्कोटाले मन्त्रालयको नियमित पत्रकार सम्मेलनमार्फत् पुस १४ गते बसैको मन्त्रिपरिषद् बैठकले लिएका निर्णय सार्वजनिक गर्नुभएको हो ।
यसैगरी, पत्रकार सम्मेलनमा वितरित विज्ञप्ति अनुसार सांस्कृतिक संस्थानको अध्यक्ष पदमा प्रेमनाथ अधिकारी र महाप्रबन्धक पदमा अशोककुमार राईलाई चारवर्षको लागि नियुक्त गर्ने निर्णय गरिएको छ ।
यसैगरी, राष्ट्रिय मानव अधिकार आयोगको सिफारिस बमोजिम जगतबहादुर कार्कीलगायत १३ जना व्यक्ति तथा परिवारलाई दोहोरो नपर्ने गरी आर्थिक सहायता/क्षतिपूर्तिवापत् १२ लाख रुपियाँ दिने निर्णय पनि उहाँले बताउनुभयो ।
चीन सरकारको सहयोगमा सञ्चालन हुने दोश्रो चरणको चक्रपथ विस्तार परियोजनाका लागि कलंकी–महाराजगञ्ज–धोबीखोला खण्डको सडक सीमा ३१/३१ मिटर कायम गर्न आवश्यक पर्न जग्गा अधिग्रहण गर्न स्वीकृति प्रदान गरेको छ ।